Muhamed Sytari

Namazi i xhumasë në xhaminë e fshatit Bardhej

(Shkodër, e xhuma, më 20 shkurt 2009) 

Të xhumanë e tretë të këtij muaji, thirrësi islam Muhamed Sytari ligjëroi nga minberi i xhamisë së fshatit Bardhej.

Ndonëse në kushte jo optimale klimaterike, për arsye të temperaturave të ulëta të ditëve të fundit, xhamia ishte e mbushur me besimtarë të moshave të ndryshme.

“Fillimisht, i lutem All-llahut për mirëqenien dhe begatinë e secilit prej jush! Atij i lutem të zbresë mëshirën dhe mirësinë e Tij për banorët e krejt fshatit tuaj!”- filloi hytben e tij thirrësi islam Muhamed Sytari.

Në brendësi të saj, ai hodhi dritë mbi shefaatin e Resulull-llahit përmbi gjynahqarët e ymetit të tij, në ditën e gjykimit.

Nëpërmjet argumenteve të bollshme, ai tregoi rëndësinë dhe gradën e lartë që ka Resulull-llahi (a.s) te Krijuesi i gjithësisë dhe privilegjin e madh që i ka bërë Ai, më të dashurit të krijesave të Tij, shefaatin.

“Argumentet e shumta që vërtetojnë ndërmjetësimin e Resulull-llahit alejhis-selam për çdo musliman që nuk i bën shirk All-llahut, në ditën e gjykimit, na nxisin ta duam me gjithë zemër profetin tonë! Të gjithë duhet të ndjehemi krenarë që jemi pasuesit e tij! Të gjithë duhet ta falënderojmë Zotin që na bëri nga ymeti i më të dashurit, më të plotit, më të madhit e më të afërtit njeri me Mëshiruesin!”- ka thënë ai.

Nëpërmjet hytbes së kësaj xhumaje, Sytari ka nxitur shtimin e salavatit përmbi të dërguarin mëshirë për botrat, duke argumentuar se ata që e shtojnë salavatin përmbi Zotërinë e tij, sidomos ditën dhe natën e xhuma, do të përfitojnë shefaatin e tij në ditën e gjykimit!

Pas faljes së namazit të xhumasë, thirrësi islam Muhamed Sytari, ka bërë edhe duanë në gjuhën shqipe, si një traditë e tij, në formë e në kohë.

Përqafimet dhe urimet e përzemërta ishin kurora e kësaj xhumaje në xhamnë e fshatit Bardhej.

 

V. Mehmeti