Muhamed Sytari

Xhamia e Plumbit dhe “Ebrehetë” e kohëve të reja!

(Shkodër, 15 dhjetor 2008) 

(Vëzhgim)

Sot pasdite shkova të vizitoj xhaminë e Plumbit, pasi ditë më parë në faqet e gazetës së myftinisë Shkodër, lexova se paska nisur një fazë e re për meremetimin e saj. Pa dyshim u gëzova, pas atij lajmi, në faqet e “Udhës Islame”.

Pamja e parë me të cilën u përballën sytë e mi, ishte po ajo pamje që për shumë vite me rreshje shiu, na kanë parë sytë, as më pak e as më shumë: Xhamia e Plumbit e mbytur nga lotët e qiellit!

Përveç saj, disa skela në fasadën ballore të xhamisë e ca shenja mbi muret e saj, tregonin për fillimin e kësaj faze. Ca fëmijë që kalonin aty rrotull, tregonin se: “Muret e xhamisë i kruajnë me tel”, kuptohet për t’i pastruar nga papastërtitë e dekadave të tëra (ndoshta edhe shekujve) të grumbulluara mbi to.

Nga ana tjetër, në ballinën e anës së djathtë të xhamisë së lashtë, gjurmët e suvatimit, kishin mbuluar gjurmët e artit të të parëve tanë, me anë të cilit, ata krijuan këtë kryevepër arkitekturore, pjesë e pandarë e qytetërimit islam, edhe në Shqipëri.

Unë nuk e di sesi do të vazhdohet më tutje me fazën e re të meremetimit të xhamisë-kible (për të cilën e kam ngritur zërin disa herë, nga tribuna të ndryshme), por me aq sa pashë, u zhgënjeva: për momentin e papërshtatshëm të fillimit të punimeve (duke ditur se stina e dimrit është stinë e papërshtatshme për ndërtim e punime të tilla delikate me veprat e kultit) dhe për mënyrën e punimit, tjetërsimin e gjurmëve origjinale të këtij objekti monumental!

Myftinia aktuale e Shkodrës, nëse i ka mbetur sadopak përgjegjësi ndaj institucioneve të veta të këtij niveli, xhamisë së Plumbit në veçanti, duhet ta shikojë më me vëmendje mënyrën e procedimit për rregullimin e dëmeve të papërgjegjshmërisë kohore të njerëzve të ndryshëm premtim-shkelës, në mënyrë që xhamisë së Plumbit t’i ruhet i paprekur identiteti i saj arkitekturor!

I bindur, se këto fjalë do të bien në veshë të shurdhër e paragjykues (sikurse ka ndodhur në tërë këto vite), i lutem Zotit Fuqiplotë të bëhet Ai mbrojtësi më i mirë i shtëpisë së Tij, nga “Ebrehetë” e kohëve të reja dhe t’i vendosë Ai në lëvizje mekanizmat e ndryshkura të parazitizmit institucional, prezent kudo në vendin tonë!

 

Muhamed Sytari, 15 dhjetor 2008