Muhamed Sytari

 

" Rrugëtime një hatibi" vepër me vlera shkencore dhe fetare

 

Vepra e re e mësuesit të Medresesë, "Haxhi Sheh Shamija" thirrësit Islam, z.Muhamed Sytarit, "Rrugëtime një hatibi", -10 vite shërbim në Xhaminë e Tophanës (1998-2008), ka disa kohë që e kam në dorë dhe vërtet jam i kënaqur për vlerat që ka ai libër.

Është i 12-ti libër që na jep z. Sytari, në një periudhë kohe nga viti 1998, kur ishte student në Damask, për të ardhur "hap pas hapi" në botime shumë serioze në vazhdim, për të arritur deri në monografi. Nuk kam ndër mend të zgjatëm më tepër në titujt e librave, por nuk mund të rri papërmendur librat për: "Vehbi Sulejman Gavoçi, Dijetar nga dijetar e ymetit", Prishtinë, 2005; "Kujtime dhe refleksione të një Ramazani", Shkodër, 2007; "Bibliografi të 'Udhës Islame' në 50 numrat e parë", Shkodër, 2007 etj. që auditori i nderuar tashmë i njeh.

Vepra e fundit i kushtohet një xhamije, ndër më të vjetrat e qytetit, Tophanës, njërës prej lagjeve të vjetra të Shkodrës, dhe flitet me përkushtim për ketë xhami, ku ai është hatib, që nga koha e mbarimit të studimeve.

Vlerat që përmban libri janë të shumta, por unë po përmend vetëm disa prej tyre si:

-  Na vihet në dorë një histori e përmbledhur e kësaj xhamije që nga krijimi i saj, më duket se para e këtij lloji për xhamitë e Shkodrës, duke shfrytëzuar burime arkivore të rëndësishme, si fjalorë enciklopedikë, fjalorë gjuhësorë dhe historikë të ndryshëm.

-  Me punën që ka bërë z. Sytari, u ka dhuruar xhematit të kësaj xhamije, një gjë që i bën krenarë për vlerat e saj dhe më gjerë gjithë muslimanëve të Shkodrës, për punën dhe shërbimin e hoxhallarëve në vite. Në botimin në fjalë përmenden të gjithë me emrat e tyre dhe kohën që kanë shërbyer, duke bërë një "histori" të shkëlqyer të viteve dhe nderimin që kanë për to, gjatë gjithë historisë.

-  Gjatë leximit të këtij libri, që ka rreth 226 faqe, bashkë me bibliografinë, të shtypura ngjeshur, tregon me hollësi gjithë punën që është bërë në këtë xhami deri në krijimin e një salle të përshtatshme që është sot, dhe e zbukuruar me kushtet më të mira.

- Gjatë leximit të librit të bëjnë përshtypje edhe materialet ku është mbështetur autori. Ato përmbajnë një material të gjallë që shprehet edhe nga 554 referenca, nga vepra të rëndësishme dhe të njohura në shqip dhe në gjuhë të huaj, që tregon se sa thellë është futur studimeve në këtë libër. Ato janë një tregues për një studiues vërtet serioz dhe me vullnet të paepur. Kemi patur rastin ta shohim këtë përkushtim të autorit edhe në libra të mëparshëm.

-    Për vlerat e gjithanshme që ka libri, përbën një të vërtetë shkencore dhe të pakundërshtueshme, duhet lexuar me kujdes dhe përfitimet janë të mëdha se z. Sytari ka derdhur mund dhe djersë të pakursyer në hartimin e këtij libri që përbën pa ndrojtje një ndër krijimet e tij më me vlerë, deri tani.

-   Është me interes dhe faqet që flasin për paraqitjen e plotë të hytbeve (ligjëratave) të mbajtura me kujdes, të rreshtuara me vite, nga hatibi i kësaj xhamije,  z. Sytari, të cilat ia rritin vlerat e librit.

-   Një vend të rëndësishëm, në librin në fjalë zënë vizitat e miqve nga Shqipëria dhe bota në këtë xhami që pasqyrohen në mënyra shumë të saktë nga autori dhe i japin "freski " librit. I ndodhur shpesh, në rase të tilla, kam fituar kënaqësi dhe emocion.

-   Mund të themi pa frikë se kush merret me botime në fushën e besimit, duhet patjetër ta njohë librin në fjalë dhe të ndikohet nga puna e z. Sytari, sepse mund të marrë shumë koncepte bashkëkohore jo vetëm në formë, por edhe ne përmbajtje.

-   Në këtë vështrim mund të marrim në konsideratë edhe vlerat fetare të këtij botimi që janë të padiskutueshme, sepse në librin në fjalë përmenden me emra shumë besimtarë të kësaj xhamije për vlerat që kanë dhe ndihmesën që kanë dhënë gjatë kohëve të ndryshme për përmirësimin e kushteve të saj, duke nderuar veten dhe xhematin e saj.

-   Ilustrimet gjatë tekstit, shpesh herë të botuara për herë të parë, janë të zgjedhura me kujdes dhe ai rritin vlerat librit. Falë teknikës që kemi tashti, ato bëhen të shkëlqyeshme dhe ia rritin vlerat botimit.

-   Shpesh, gjatë faqeve te librit, ndeshim edhe me fushata bamirësie organizuar nga këshilli i xhamisë dhe janë mbledhur shuma të konsiderueshme për rivendosjen ë kësaj xhamie në kushtet që është sot.

Në përfundim të këtij parashtrimi të shkurtër u përpoqa të vë në dukje disa nga vlerat me treguese dhe më domethënëse të këtij libri duke i thënë: "Të lumshin duart" për këtë pasuri që na ke dhënë dhe ju urojmë suksese në botimet e ardhshme.