Muhamed Sytari

Takim rreth dialogut të qytetërimeve dhe shkëmbimeve kulturore dhe shkencore mes Lindjes dhe Perëndimit

(me pjesëmarrjen e dijetarëve nga Kanadaja, Danimarka, Shqipëria dhe Siria) 

 

Fondacioni “Shejkh Ahmed Keftaro” organizoi dje në Damask një takim dialogues, në të cilin merrnin pjesë dijetarë myslimanë nga Siria dhe Shqipëria, klerikë dhe akademikë nga Danimarka dhe Kanadaja.

Në këtë takim u diskutua rreth disa çështjeve, të cilat kanë të bëjnë me qytetërimet dhe shkëmbimet kulturore dhe shkencore mes Lindjes dhe Perëndimit.

Prifti Pjer Ramsdel, pastori i kishës Prosnes në Kopenhagen, theksoi nderimin dhe vlerësimin e tij ndaj vlerave të larta të Islamit dhe mesazhit të tij mbarëbotëror. Ai dënoi të gjitha fyerjet dhe akuzat që janë bërë në drejtim të Islamit. Gjithashtu vuri në dukje vlerat e larta të bashkëjetesës që ekziston në Siri, mes të gjithëve, sidomos mes myslimanëve dhe të krishterëve. Kjo lloj bashkëjetese është bërë shembull i vetëm, i cili tërheq sytë e Perëndimit për të vizituar këtë tokë të bekuar gjatë gjithë historisë së saj.  

Kjo është ajo tokë, e cila ka mbartur fe dhe qytetërime të ndryshme, fakt i cili e ka bërë sot dritë rrezatuese të mesatarizmit dhe të përqafimit të kishave me xhamia.

Z. Ramsdel përmendi edhe kontributin e madh që fondacioni “Shejkh Ahmed Keftaro” po jep në ndërtimin e urave lidhëse me Perëndimin, veçanërisht me Danimarkën, për njohjen e Islamit dhe parimeve të tij, qytetërimit arab dhe rrezatimit të tij, i cili i dha shumë botës në shkencë dhe dituri.

Nga ana e tij, profesor Patric Broduar nga Kanadaja, theksoi shembullin sirian, i cili ka përfshirë të gjitha fetë dhe sektet për të formuar familjen e madhe të lidhur siriane, e cila me parimet dhe vlerat e saj vërteton harmoninë e mirë mes besimit dhe kombit. Gjithashtu ai i bëri thirrje elitës në Perëndim të vizitojnë Sirinë dhe të njohë nga afër qytetërimin e pasur dhe barazinë mes grupeve të ndryshme, të trashëguar prej shekujsh, bashkëjetesën që institucionet islame dhe të krishtera realizojnë duke vërtetuar esencën e përbashkët të mesazheve qiellore.

Ndër të tjera Z. Broduar hodhi idenë e realizimit të një projekti të përbashkët mes organizatave kanadeze të dialogut dhe fondacionit “Shejkh Ahmed Keftaro”, për prezantimin e Islamit dhe esencës së parimeve të tij në Perëndim, të cilin njerëz dhe klane të ndryshme po mundohen ta akuzojnë dhe t’i dëmtojnë imazhin.

Ndërsa shkrimtari dhe thirrësi islam Muhamed Sytari, bëri një ekspoze të punës fetare të fondacioneve fetare në Siri, të cilat kanë në gjirin e tyre mijëra studentë me kombësi të ndryshme nga të gjithë kontinentet, me qëllim të mësimit të gjuhës arabe dhe studimeve fetare, mesatariste. Duke theksuar se këtë mirësi, historia do ta shkruajë si përpjekje të presidentit Beshar El- Esed në luftën kundër mendimit ekstremist, i cili qarkullon sot nëpër botë, për t’u përdorur për qëllime politike dhe shkak për prishjen e drejtësisë dhe rregullit në botë.

Ai theksoi: “Kam patur nderin të pajisem me dituri fetare në fondacionin “Shejkh Ahmed Keftaro” për shtatë vjet me radhë dhe tani punoj në Shqipëri, ku përmes xhamive dhe organizmave tona përçojmë atë që jetuam dhe shikuam këtu në Siri; bashkëpunimin dhe lidhjet e forta mes të gjithë bijve të këtij vendi, xhamive dhe kishave. Kjo na ka bërë të fitojmë një nderim të madh në shoqërinë tonë shqiptare, së bashku me elitën e thirrësve islamë, të cilët janë diplomuar në Siri, në rrugën tonë përballë mendimit ekstremist, duke u bërë kështu pjesëmarrës në forcimin e sigurisë dhe qetësisë në vend, ashtu siç jeton sot Siria”.

Nga ana e tij, Dr. Salahudin Keftaro, drejtor i përgjithshëm i fondacionit “Shejkh Ahmed Keftaro”, i bëri thirrje elitës intelektuale dhe fetare në Perëndim të vizitojë Sirinë dhe të vëzhgojë historinë dhe qytetërimin e saj botëror, i cili dëshmon qartë sot për harmoninë dhe bashkëpunimin mes të gjithë bijve dhe grupeve fetare e laike, të cilat qëndrojnë në një rresht të vetëm kundër sfidave të kohës. Doktor S. Keftaro bëri të ditur edhe për popullin arab palestinez dhe irakian, të cilët jetojnë në tragjedi të vërtetë ku si pasojë e pushtimit dhe sulmeve, ka lindur fryma e ekstremizmit dhe e urrejtjes.

Ai iu drejtua bashkësisë ndërkombëtare dhe Organizatës së Kombeve të Bashkuara, për një punë më serioze në drejtësinë e popujve dhe në ushtrimin e vetos së tyre mbi njerëzit e vendimeve politike botërore, veçanërisht zyrës amerikane në heqjen dorë prej mbështetjes që kjo e fundit po i jep Izraelit, ku me këtë gjë po del edhe jashtë ligjeve ndërkombëtare dhe rregullave të tyre. Sepse me atë që Izraeli po bën, ai vetëm se praktikon ligjin e xhunglave dhe imponimin e politikës së forcës, e cila dita-ditës po shton edhe më tepër urrejtjen, armiqësinë dhe padrejtësinë, sidomos në Lindjen e Mesme.   

Gjithashtu Dr. Salahudin Keftaro u bëri thirrje të gjithë atyre perëndimorëve të drejtë, të cilët kanë filluar të vizitojnë Sirinë, të shohin dhe të vështrojnë me syrin e drejtësisë se çfarë po ndodhë në rajon dhe më pas t’ua bëjnë të qartë të vërtetën popujve të tyre atje ku jetojnë.

 

Marrë nga e përditshmja siriane:

“TISHRÍN”, Damask, nr. 10063,

e diel, më 30 dhjetor 2007.