Muhamed Sytari

Teravia e parë në xhaminë e Tophanës

(Shkodër, më 31 gusht 2008) 

Ramazan 1429/2008

  

   ... Dhe kthehet kjo hënë e re në mes nesh! Dhe kthehet ky muaj i madhërueshëm i Ramazanit me begatitë, mirësitë dhe ruhanijetin e tij! Dhe kthehet teravia e përkushtimit për të ftuar besimtarët drejt mihrabeve të lutjes, adhurimit, faljes..!

   Hyrja në xhaminë e Tophanës, për namazin e teravisë sonte, shoqërohej edhe me një gëzim tjetër, pos atij të fillim-Ramazanit të sivjetshëm. Mesditën e sotme, xhamia jonë u pajis me tapet të ri, i cili filloi të shtrohej pas namazit të iqindisë. E, teksa besimtarët hynin në xhami për faljen e teravisë, habia nga pamja e re dhe gëzimi legjitim, lexohej dukshëm në fytyrën e secilit prej tyre. Si të thuash, xhamia kishte ndryshuar pamje, ishte më e re, më e ëmbël, më e dritshme, më e zbukuruar me stolitë e këtij muaji të madhërueshëm, nata e parë e së cilit i solli xhamisë së Tophanës jo pak mbarësi!

   Xhaminë, fillimet e së cilës datojnë në vitin 1617, e kishte mbuluar një dritë e bardhë, ëmbëlsia e së cilës të bënte të strukeshe në gjirin e saj, plot dashuri dhe mall. Ishte dashuri bardhësishë dhe mall për netët e këtij muaji, hëna e të cilit u shfaq sonte mbi qiellin e njerëzimit, si një dhunti rabbanite plot mëshirë, falje dhe amnesti hyjnore.

   Xhaminë e Tophanës sonte, e kishin mbuluar dritat e natës së parë të një Ramazani të mbarë e të begatë. Njerëzit përqafoheshin paqshëm në mes tyre. Uronin muajin, këtë natë dhe.., nuk hezitonin me “elhamdu lil-lah” në gojë të shtrëngonin duart edhe për pamjen e re, tapetin e faljes që i shtonte xhamisë madhështi mbi madhështinë e saj!

   Thirrjes së ezanit të jacisë i parapriu një ders i shkurtër, në të cilin tërhoqa vëmendjen e besimtarëve të pranishëm drejt mirësive të shumta, me të cilat All-llahu Mëshirëplotë na drejtohet e na fton nga besimi dhe adhurimi i Tij. Përmenda me radhë, ndryshimet e mëdha që ka pësuar kjo xhami në këto katër vite të fundit, restaurimet e ndryshme, modifikimet në ambientin e faljes e deri te risia më e re e saj, tapeti jeshil, dhurata më e këndshme e këtij Ramazani për të.

   Pastaj prezantova para xhematit, imamin e teravisë, për krejt muajin e Librit me harfe të nurta, teologun e nderuar Alban Kali, bilbilin e Kur’anit, të cilin e ka veçuar All-llahu me dhuntinë e këndimit të rrjedhshëm dhe me një zë tipik oriental, të Fjalës së Tij.

   Ai këndoi edhe ezanin e jacisë së parë të këtij muaji. Me zërin e tij kumbues na emocionoi të gjithëve. Nuk kishte sesi të fillonte më mirë kjo natë e parë e teravisë së re të Ramazanit 1429, në xhaminë e Tophanës.

   Namazin e jacisë e drejtoi thirrësi islam Lavdrim Hamja, i cili kthehej në xhaminë e Tophanës pas një shërbimi shumë fisnik gjatë gjithë sezonit veror në faltoren e improvizuar për pushuesit e plazhit të Velipojës, në hotel “Argenti”.

   Kjo natë e begatë kishte mbledhur në sofrën e saj hoxhallarë të nderuar, teologë punëtorë, njerëz të përkushtuar në shërbim të Thirrjes Islame.

 

Muhamed Sytari

---