Muhamed Sytari

Tendenca xhahile që kthejnë pas rrotën e historisë!

(Shkodër, më 11 dhjetor 2009) 

“Nxitja e sondazheve ndaj “rrezikut” të minareve në Zvicër, është një tendencë xhahile që ka qëllim të kthejë pas rrotën e historisë”- ka thënë në zemër të hytbes së xhuma, më 11 dhjetor 2009, nga minberi i xhamisë Tophanë Imam Muhamed Sytari.
“Është paradoksale që pikërisht nga Zvicra e diversitetit kulturor, etnik, gjuhësor e intelektual, të vijnë këto sinjale negative që nuk i shërbejnë kohës, as përpjekjeve botërore sot për të rritur frymën e dialogut, bashkëjetesës ndërfetare dhe respektimit të të drejtave të njeriut. Më 29 nëntor 2009, 57.5 % e popullatës zvicerane votoi pro “rrezikut” të ndërtimit të minareve në vendin e tyre, të nxitur nga Partia Popullore Konservatore, një parti e djathtë! As e majta dje, as e djathta konservatore sot, nuk mund ta shuajnë zërin e Islamit në botë!
E kuqja dje, u përpoq me zjarr e hekur, por pa rezultat! Edhe e djathta xhahile e kësaj kohe që nxit kthimin e rrotës së historisë nga pas, nuk do të arrijë asgjë!
Historia e jonë e ka faqen e bardhë, ndërsa e tyrja e ka të kuqe dhe të zezë! Të kuqe, si gjaku i muslimanëve të pafajshëm të masakruar nga kryqtarët vrastarë, injorantët e mesjetës! Të zezë, si boja e qindra e mijëra dorëshkrimeve dhe librave të muslimanëve, që dogjën dhe hodhën nëpër lumenjtë e vendeve që damkosën me demonizmin e tyre.
Historia e jonë, është historia e Hz. Omerit, që edhe kur iu dorëzuan çelësat e Kudsit në Palestinë, nuk pranoi të falej në kishën e të krishterëve, nga frika se mos muslimanët pas tij do ta kthenin këtë kishë në xhami në respekt dhe nderim të tij! Historia e jonë, është historia e Shejkhul-Islamit Zenbili Ali Efendi, i cili ndaloi Sulltan Selim Javuzin e famshëm, për të islamizuar krejt Ballkanin, në hakmarrje të vrasjeve dhe masakrave të kryqtarëve në Andaluzi!”- ka thënë në mes të tjerave hatibi i xhamisë Tophanë, i cili nuk ka ngurruar të krahasojë atë që po ngjet me minaret e Zvicrës, me realitetin e projektit të xhamisë së madhe të qendrës së Tiranës, për të cilën “nuk firmosin vëllezërit e atyre që duan të kthejnë pas rrotën e historisë në Zvicër!”.
Gjithashtu ai ka përmendur dhe ndodhinë më të fundit të ndodhur ditën e djeshme, më 10 dhjetor 2009, ku në një periferi të Lozanës, biznesmeni Gyjom Moran (jomusliman), në shenjë proteste ndaj sondazhit që e ka quajtur të turpshëm, ka kthyer një oxhak të një prej punishteve të tij, në minare islame, duke e zbukuruar edhe me gjysëmhënën ngjyrë ari!
“Duhet ditur se sot në Zvicër, sipas statistikave zyrtare, jetojnë mbi 400 mijë muslimanë, nga 5.7 milion banorë që ka ky vend. Kjo shifër e bën Islamin fenë e dytë pas krishtërimit. Ndërkohë, nga 200 qendra islame që ndodhen në këtë vend, vetëm 4 prej tyre kanë minare! Ndërsa “minareja” e 5- të përfundoi së ndërtuari dje mbi oxhakun e punishtes së një të krishteri në periferi të Lozanës”- ka përfunduar Sytari.

V. Mehmeti