Muhamed Sytari

Tarikatet islame janë një vlerë e kulturës islame në Shqipëri

(Sytari: “Ka ardhur koha të shikohet nga e ardhmja e përbashkët në shërbim të Thirrjes Islame...”) 

Shkodër, më 23 shkurt 2008

Sot paradite, thirrësi islam Muhamed Sytari ka pritur në bibliotekën e tij Sheh Qemaludin Rekën, prijës i xhamisë së Ehli Bejtit në Tiranë, me të cilin ka diskutuar rreth aktualitetit të Thirrjes Islame në Shqipëri dhe rrugët e bashkëpunimit të mëtejshëm në mes përfaqësive islame në vendin tonë.

Në bisedën e tij, thirrësi islam Muhamed Sytari ka vlerësuar rolin pozitiv të tarikateve islame në vendin tonë në ruajtjen e harmonisë ndërislame dhe forcimin e ndjenjave të sinqerta islame dhe kombëtare nëpërmjet aktivitetit të tyre. Njëkohësisht, ai ka theksuar se ka ardhur koha të shikohet nga e ardhmja e përbashkët në shërbim të Thirrjes Islame, duke u distancuar nga e shkuara e pluhurosur e konfuze.

Nga ana e tij Sheh Qemaludin Reka, ka falënderuar kontributet e thirrësit islam Muhamed Sytari në shërbim të unitetit islam në vendin tonë dhe ka theksuar se është detyrë e prijësve fetare aktualë të punojnë sëbashku për t’i shërbyer harmonisë islame dhe kombëtare, sipas mësimeve të Kuranit, profetit Muhammed (a.s) dhe Ehli Bejtit.

Në përfundim të takimit, mikpritësi i ka dhuruar mikut të tij një punim në dru të xhamisë së Tophanës, si një kujtim simbolik nga qytetit i Shkodrës.

Gazetari