Muhamed Sytari

Takim dialogues ndërkombëtar rreth ballafaqimit të qytetërimeve dhe dialogut ndërfetar në botë

(afrimi dhe kuptimi i Islamit me botën perëndimore) 

   Në kuadrin e aktiviteteve që afrojnë kuptimin e duhur të Islamit me botën perëndimore dhe qartësimin e imazhit të tij sot në botë, që zhvillon Fondacioni më imadh islam në Lindjen e Mesme “Shejkh Ahmed Keftaro” në Damask të Sirisë, më datën 28 dhjetor 2007, në hollin e xhamisë “Ebu Nur”, u zhvillua një takim dialogues rreth çështjeve të ballafaqimit të qytetërimeve dhe dialogut ndërfetar në botë.

   Në këtë takim ndërkombëtar referuan drejtori i përgjithshëm i këtij fondacioni, Dr. Salahudin Keftaro (Siri), pastori Pjer Ramsdel (Danimarkë), thirrësi islam Muhamed Sytari (Shqipëri) dhe studiuesi Patric Broduar (Kanada), duke u përqendruar te vlerat e qytetërimit islam dhe mesazheve qytetëruese të Thirrjes Islame.

   Në fjalimet e tyre, ata vlerësuan edhe harmoninë ndërfetare ekzistuese në Siri, si një shembull unikal në botë, duke patur parasysh origjinalitetin e kësaj harmonie dhe distancimin nga servilizmat dhe ekzagjerimet injorante prezente aty-këtu edhe në vende të tjera.

   Në fjalimet e tyre referuesit vlerësuan gjithashtu rolin e rëndësishëm të Fondacionit islam “Shejkh Ahmed Keftaro”, në prezantimin bashkëkohor dhe origjinal të mësimeve të Islamit, i cili e vlerëson njeriun, cilindo njeri, duke respektuar të drejtën e jetës, besimit dhe lirisë së praktikimit të riteve fetare.

   Njëkohësisht referuesit në këtë takim u distancuan nga çdo lloj shfaqje ekstremiste që dëmton imazhin e fesë së pastër dhe prekë ndjenjat besimore të besimtarëve në botë. Sikurse dënuan çdo përpjekje për të prishur imazhin e mësimeve qytetëruese të Islamit që thërret për dialog dhe harmoni me bijtë e feve qiellore, në shërbim të shoqërive dhe harmonisë globale në planetin tonë.

   Gazetari

  21.01.08