Imam Muhamed Sytari

Syneti dhe bidati

(Shkodër, xhamia Tophanë, më 28 janar 2010) 

Në dersin e natës së xhuma, më 28 janar 2010, në xhaminë e Tophanës, vaizi i saj Imam Muhamed Sytari ka vazhduar të flasë për të dytën javë me radhë mbi domethënien e bidatit në fe. Sonte ai, është ndalur te bidati në adhurim, ku nëpërmjet argumenteve dhe shembujve konkretë ka shpjeguar domethënien e tij dhe llojet përkatëse.
Gjatë kësaj mbrëmje fetare, vaizi i xhamisë Tophanë ka tërhequr vëmendjen e të pranishëmve ndaj një hadithi profetik, të cilin e ka cilësuar si “alarm profetik”, në të cilin thuhet: “Sa herë që një popull shpikin një bidat (në fe), do të ngrihet prej tyre një traditë profetike”.
Ndër të tjera, ai ka thënë: “Më thoni sa tradita profetike islame janë zhdukur dhe po zhduken nga traditat tona kombëtare nëpërmjet bidateve të reja që po degradojnë dita-ditës dinjitetin e muslimanit shqiptar? Ku është hijeshia dhe serioziteti i muslimanes së dikurshme, sot në kohën e përzierjes së shfrenuar, mbrëmjeve rinore, “party-ve” ekstremisht imorale etj.?!”
Dersi i natës së xhuma, nga java në javë tërheq vëmendjen e të rinjve dhe besimtarëve të ndryshëm që janë të interesuar për të mësuar përherë e më shumë rreth fesë së tyre dhe haditheve të shumta profetike që e shpjegojnë atë.

www.muhamedsytari.net