Muhamed Sytari

“Shoqëri islame dhe thashethemesh, nuk shkon!”

(Shkodër, më 30 tetor 2009) 

 “Shoqëri islame dhe thashethemesh njëkohësisht, nuk shkon! Përse muslimanët e sotëm gënjejnë, kur muslimani nuk gënjen? Përse mashtrojnë njëri-tjetrin, kur muslimani nuk e bën këtë? Përse kur ulen në tavolinat e tyre, në vend që të angazhohen me biseda serioze që ndikojnë në lartësimin e tyre besimor, intelektual e qytetar, merren me fjalë për njërin e tjetrin, sidomos për hoxhallarët e tyre?”- kanë qenë disa nga pyetjet e bëra nga hatibi i xhamisë Tophanë, Imam Muhamed Sytari gjatë hytbes së ditës së xhuma, më 30 tetor 2009.
Në këtë hytbe, ai ka vazhduar të flasë mbi rrugët e afrimit me All-llahun, Zotin e botrave, duke theksuar: “Shumë muslimanë mendojnë se rrugët e vetme të afrimit me Zotin janë pesë shtyllat e Islamit. Gabohen! Pa dyshim që pesë shtyllat e fesë tonë janë rrugët më garante të afrimit me Zotin, por jo të vetmet! Janë me dhjetra mënyrat dhe rrugët e afrimit me All-llahun e Madhëruar!”
Në këtë hytbe, hatibi i Tophanës, është përqendruar kryesisht te sëmundjet e gjuhës dhe te thyerja e besës duke konstatuar se: “Muslimani është njeri me gjuhë të pastër, njeri i besës! Muslimani nuk gënjen, nuk merr të tjerët nëpër gojë, ruhet nga mashtrimi dhe paragjykimi nëpërmjet fjalëve. Muslimani nuk e thyen besën e dhënë! Muslimani nuk është hipokrit!”

  
Hytbeja e xhumasë është regjistruar dhe mund të ndiqet në youtube, nëpërmjet kësaj adrese:

(http://www.youtube.com/watch?v=FJ-wf-hHm3M&feature=related).
 

V. Mehmeti