Muhamed Sytari

“Sa  mjeran, ai që humbet mëshirën e Zotit!”

(Shkodër, e xhuma, më 19 dhjetor 2008) 

Në xhumanë  e tretë të këtij muaji, të parafundin e këtij viti, në hytben e tij të xhumasë, thirrësi islam Muhamed Sytari, ka folur për shkaqet që e largojnë njeriun nga mëshira e All-llahut. Nëpërmjet minberit të xhamisë së Tophanës, ai ka bërë edhe një krahasim ndërmjet shkaqeve që i ndalojnë njeriut përfitimin e mëshirës dhe fakteve të shumta me anën e të cilave Krijuesi Fuqiplotë i afrohet krijesave të Tij, me mirësinë dhe mëshirën e pakufishme.

“Sa mjeran është ai njeri që i kalon tërë jeta pa përfituar në asnjë moment nga flladet mëshironjëse të Krijuesit Fuqiplotë, të përhapura kudo në atmosferën tonë!

Sa mjeran është ai njeri që i kalon tërë jeta pa kuptuar veten, pa vëzhguar në mrekullitë e shumta me të cilat Krijuesi, është prezantuar, në veten e tij, në mjedisin e gjithësinë!

Motra dhe vëllezër! Nëpërmjet haditheve të shumta, i dërguari i All-llahut (a.s) na ka treguar sesi Zoti, me mirësinë dhe mëshirën e Tij ndaj nesh, i shfaqet njerëzisë, duke i dhënë mundësinë natë pas nate e ditë pas dite, për t’u afruar me Të, për të kërkuar prej Tij e, për të shtuar dashuri mbi dashuri në marrëdhënie me Të”- ka theksuar Sytari gjatë hytbes së tij.

Në përfundim të saj, ai ka kërkuar nga xhemati i xhamisë së Tophanës, që të zgjasin dorën e bamirësisë për të kontribuar për ndërtimin e xhamisë së re në zonën  Fshati i Ri, Postribë.

Në përfundim të xhumasë, një shumë e konsiderueshme e mbledhur nga xhemati i kësaj xhamie, i është dorëzuar komisionit të xhamisë së re.

V. Mehmeti