Muhamed Sytari

“Rrugëtime të një hatibi”, në duart e lexuesit

(autori ka skalitur historinë dhjetë vjeçare të xhamisë së Tophanës) 

Doli në qarkullim libri më i ri i thirrësit islam Muhamed Sytari, titulluar: “Rrugëtime të një hatibi”. Në faqet e tij, autori ka skalitur historinë dhjetë vjeçare të xhamisë së Tophanës, ku edhe shërben si vaiz dhe hatib që nga viti 1998.

Në një farë mënyre, libri i ri i Muhamed Sytarit është monografia e parë në shërbim të jetës dhe veprimtarisë së një xhamie shqiptare, asaj të Tophanës. Aty janë dokumentuar të gjitha aktivitetet, tematika e hytbes së xhumasë, lista e plotë e shkrimeve dhe kronikave të botuara në shtypin periodik islam, por jo vetëm, brenda vendit dhe jashtë tij, në lidhje me këtë xhami etj.

Në shërbim të hatibëve, por edhe të lexuesit në përgjithësi, autori ka përkthyer edhe 301 hadithe relativisht të shkurtra nga enciklopedia e Imam Sujutit, “El-xhamius-sagir”, gjë që ia shton vlerën këtij libri.

“Autori ka ba mund të madh, tue hulumtue nëpër arkiva e biblioteka për të nxjerrë shumë shkrime, poezi satirike të shkruara në gazetat e revistat e kohës, disa prej të cilave citohen edhe në libër.

Por gjithë ata shkrime e poezi satirike, si agjitacion i madh kundra fesë, derisa u arrit edhe krijimi i muzeumit të parë ateist në botë, me qendër në Shkodër, kishin si qëllim kryesor largimin e njerëzve nga besimi në Zotin! Gjithë kjo punë keqdashëse ndaj fesë nuk pati rezultat! Këtë, më së miri e vërteton dita e rihapjes së xhamisë Plumbit, pas 35 vjetësh, me pjesëmarrje të madhe të popullit të Shkodrës, të çdo moshe, sidomos të rinisë. Kjo vërtetoi edhe një herë kotësinë e propagandës keqdashëse kundra fesë. Por  njëkohësisht vërtetoi se populli i Shkodrës asht besimtar, beson në Zotin dhe kryen me dëshirë ritet dhe urdhëresat fetare.

Për mendimin tem, autori me këta shkrime, ka ba një punë të mirë për t’i treguar brezave të ardhshëm luftën e madhe që i asht ba fesë e dogmave të saj. Merita e tij është se ai është autori i parë që ka tregue në mënyrë konkrete këto veprime monstruoze të diktaturës ateisto-komuniste! I lumtë!”- shkruan ndër të tjera, në parathënien e librit, Haxhi Faik Hoxha, myfti i Shkodrës në vitet 1991 – 2003.

Autorit i urojmë mbarësi dhe frute të mëtejshme në punën e tij shkencore dhe në shërbim të Thirrjes Islame, me urtësi e dituri!

www.muhamedsytari.net