Muhamed Sytari

Promovohet libri “Rrugëtime të një hatibi”

(Shkodër më, 30 maj 2009) 

Në një atmosferë të gëzueshme, në mesin e personaliteteve të ndryshme fetare islame, intelektuale, studentëve të Universitetit të Shkodrës, besimtarëve të shumtë, miqve e të ftuarve nga jashtë Shkodrës, me rastin e Mevludit Sherifë, përkujtimit të Lindjes së Hz. Muhammedit (a.s), thirrësi islam Muhamed Sytari, hatib i xhamisë Tophanë, organizoi promovimin e librit të tij të ri: “Rrugëtime të një hatibi”.

Aktiviteti që u zhvillua në sallën e madhe të konferencave, në ambientet e Grand Hotel Europa, ditën e shtunë, më 30 maj 2009, ora: 18.30, ishte një dëshmi e qartë e domosdoshmërisë së organizimit të aktiviteteve të tilla që mbledhin rreth sofrës së dijes dhe fesë, shtresa të ndryshme të shoqërisë tonë, nevojtare të mesazheve që burojnë nga këto tubime qytetëruese.

Aktiviteti që u drejtua me shumë elokuencë nga teologu Altin Loshi, nisi me këndimin e një pjese kur’anore nga teologu Alban Kali.

Më pas promovimi i librit në fjalë vijoi me përshëndetjen e bërë nga H. Faik Hoxha, myfti i Shkodrës (1991-2003), i cili vlerësoi punën dhe angazhimin e Sytari që në ditët e para të kthimit të tij nga studimet në Damask të Sirisë, duke u vënë në shërbim të myftinisë Shkodër, si hatib i xhamisë Tophanë. Ai përshëndeti edhe arritjet e reja të xhamisë Tophanë duke e falënderuar hatibin e saj për angazhimet në këtë drejtim.

Aktiviteti vijoi me diskutimet e bëra nga prof. dr. Njazi Kazazi, prof. as. Dr. Bajram Xhafa dhe mr. Genti Kruja, të cilët hodhën dritë mbi vlerat e këtij libri, ku përmblidhet historia e xhamisë Tophanë, ndër më të vjetrat në qytetin e Shkodrës, lufta e sistemit komunist kundër Islamit dhe mësimeve të tij, vlera e arkivimit të aktiviteteve të ndryshme të zhvilluara në xhaminë e Tophanës gjatë dhjetë viteve të fundit, dobia e 301 haditheve të përkthyera nga autori nga gjuha arabe etj.

Më pas, të pranishmit patën kënaqësinë të ndjekin nëpërmjet videoprojektorit një material ku shfaqej historiku i xhamisë Tophanë nëpërmjet fotove të shumta të aktiviteteve të saj ndër vite.

Në fjalën e tij autori i librit, ndër të tjera ka thënë: “Libri “Rrugëtime të një hatibi”, është një përpjekje për të pajisur xhaminë shqiptare me një arkiv të gjallë të jetës së saj, në shërbim të brezave që do të vijnë pas nesh!

Të gjithë jemi dëshmitarë që në një mënyrë a një tjetër taborrat e iblisit, nëpërmjet politikave të ndryshme dhe vekilëve të tyre, po përpiqen dita-ditës ta shveshin individin shqiptar nga identiteti i tij islam, me pretendime nga më të ndryshmet, shpesh qesharake.

Kryqëzata e re ndaj Islamit, profetit Muhammed (a.s), Kur’anit Famëlartë dhe simboleve të ndryshme islame, edhe në vendin tonë, ka kohë që lëvron qetësisht në atmosferat e ndryshme të kësaj shoqërie. E, përballë kësaj roli i institucionit të Thirrjes Islame duhet të jetë më i organizuar se asnjëherë tjetër!...

“Rrugëtime të një hatibi”, në të vërtetë, është edhe një thirrje e fortë për ndërgjegjësimin e faktorëve kryesorë të Thirrjes islame në këtë vend, për të vendosur mbi interesat personale, ato të Thirrjes Islame, kulturës dhe qytetërimit të saj!”

Pas fjalës së autorit, të pranishmit kanë dëgjuar me vëmendje edhe fjalën e myftiut të Krujës, z. Islam Hoxha që solli përshëndetjen e kryetarit të Komunitetit Mysliman Shqiptar, H. Selim Muça. Nëpërmjet saj, ai vlerësoi angazhimet e thirrësit islam Muhamed Sytari në shërbim të fesë islame dhe mesazheve të saj qytetëruese, nëpërmjet aktiviteteve të tij në sfera të ndryshme të Thirrjes Islame.

Pas përfundimit të aktivitetit, të pranishmit morën pjesë në ftesën për çaj, ku përshëndetën thirrësin islam Muhamed Sytari për librin e tij dhe ndanë së bashku kënaqësinë e këtij takimi me vlera.

 

Ilir Dizdari

Imam i xhamisë Tophanë