Muhamed Sytari

Përmbytet sërish Xhamia e Plumbit…

(Shkodër, më 8 nëntor 2009) 

 Vazhdon të thellohet dita-ditës gropa e neglizhencës institucionale ndaj Xhamisë së Plumbit, një ndër objektet e kultit më të rëndësishme islame në vendin tonë.
Pas shirave të ditëve të fundit, ajo ka përfunduar sërish e mbytur nga reshjet dhe mungesa e ndërhyrjeve të domosdoshme për shpëtimin e saj.
Para disa kohëve, punonjës të Institutit të Monumenteve të Kultit në Shkodër, kanë bërë disa ndërhyrje, të cilat duken shumë sipërfaqësore duke iu referuar realitetit të kësaj Xhamie pas reshjeve të fundit.
Në një intervistë të dhënë për Tv1 Channel, Imam Muhamed Sytari ka fajësuar Bashkinë Shkodër dhe kryetarin e saj, IMK Shkodër dhe institucionin përgjegjës për Xhaminë e Plumbit për mosangazhim dhe nëpërkëmbje të theksuar të realitetit të saj.
“Muslimanët duhet ta ngrijnë zërin e tyre më tepër për këtë xhami me vlera. Kryetari i Bashkisë Shkodër, duhet të hedhë sytë edhe nga kjo zonë, që është ndër më të vjetrat dhe me një histori dhe vlerë shpirtërore dhe qytetare të njohur për qytetin tonë. Nuk jam kundër pedonaleve në lagje të ndryshme të Shkodrës, por të fillohet nga koka, të ndërtohet dhe të meremetohet rruga që të shpie te Xhamia e Plumbit, të mos lihet pas dore lagjja e Tabakëve me vlerat e saj të shumta shpirtërore, qytetare e kombëtare! Muslimanët duhet t’u dalin për zot vlerave të tyre, jo t’I lënë në dorë të njerëzve të papërgjegjshëm, të paqytetëruar e që nuk kanë asnjë lidhje as me qytetarinë shkodrane, as me vlerat e saj të shumta!”- ka thënë ndër të tjera Sytari.
Edhe h. Mithat Myftija, imam i xhamisë së Plumbit ka shprehur indinjatën e tij në lidhje me këtë realitet të Xhamisë dhe krejt lagjes së lënë pas dore nga të gjitha institucionet e Shkodrës dhe përtej saj!
Sot pasdreke një grup besimtarësh janë mbledhur në ambientet e jashtme të kësaj xhamie duke sinjalizuar pakënaqësitë e tyre ndaj këtij realiteti të hidhur të Xhamisë së Plumbit dhe lagjes së vjetër të Tabakëve.

V. Mehmeti