Muhamed Sytari

Një e xhuma e veçantë në xhaminë e Tophanës

(Shkodër, e xhuma, më 28 mars 2008)  

Përkujtimi i lindjes së të dërguarit të All-llahut, hazreti Muhammedit (a.s) në xhaminë e Tophanës, për këtë vit, ka nisur me aktivitete të larmishme që mbartin në vetëvete mesazhe të rëndësishme në shërbim të Thirrjes Islame.

Të xhumanë e datës 14 mars 2008, disa ditë para afrimit të datës së 12 rebiulevvelit (sivjet, 20 mars 2008), pas namazit të xhumasë, xhematit të kësaj xhamie iu dhurua libri: “Ky është profeti Muhamed (a.s), i dërguari i Zotit për mbarë njerëzimin”, i përgatitur për botim nga Instituti Shqiptar i Mendimit dhe i Qytetërimit Islam (dhuratë e botuesit për xhematin e kësaj xhamie), si dhe një stilolaps me shënimin: “Resulullah- në zemrat tona – Xhamia Tophanë”, nga fondi i xhamisë Tophanë.

E xhumaja e datës 28 mars 2008, rezervoi një aktivitet të veçantë për xhematin e kësaj xhamie, zhvillimin e një aktiviteti me përmasat e një sesioni shkencor, personazhet e të cilit, nga ana gjeografike i kalonin kufijtë e Shkodrës dhe të Shqipërisë, nga ana intelektuale i kalonin kufijtë e xhamisë, e nga ana besimore kalonin në kufijtë e ndërfetarizmit...

Pas hytbes së xhumasë mbajtur nga hatibi i kësaj xhamie, thirrësi islam Muhamed Sytari, u bë falja e xhumasë nën drejtimin e myftiut të Shkodrës, Imam Ndriçim Sulejmani. Pas faljes së xhumasë, xhamia mori pamjen e një salle konferencash, ku para të pranishëmve ishin ulur myftiu i Shkodrës, prijësi i Mesxhidi Ehli Bejtit, Tiranë, Sheh Qemaludin Reka, hatibi i kësaj xhamie, studiuesi italian Donato Martuccio, i Universitetit të Leçes, euroetnologu Gëzim Uruçi dhe thirrësi islam Lavdrim Hamja.

Në rolin e organizatorit, hatibi i kësaj xhamie, prezantoi të ftuarit para xhematit dhe u lut që përkujtimi i lindjes së hz. Muhammedit (a.s) të shërbejë për të forcuar urat e vëllazërisë islame, urat e komunikimit ndërfetar e ato të besimit e dijes, në shërbim të mesazheve udhëzuese me të cilat Islami i drejtohet njerëzimit.

Sheh Qemaludin Reka, në emër të vëllazërisë Rifaite në Shqipëri vlerësoi unitetin dhe harmoninë e muslimanëve në mes vete, duke shprehur gëzimin e tij për pjesëmarrjen në këtë tubim të vëllazërisë dhe harmonisë islame, në këtë ditë të begatë përkujtimi të hazreti Muhammedit (a.s).

Studiuesi italian Donato Martuccio, si një mik special i këtij tubimi, falënderoi organizatorët për ftesën, theksoi kënaqësinë e tij për pjesëmarrjen në aktivitet në xhaminë e Tophanës dhe shprehu dëshirën e rikthimit në këtë xhami, në mesin e xhematit të përzemërt të saj.

Nga ana e tij, studiuesi Gëzim Uruçi, hodhi dritë mbi traditën shumëshekullore dhe origjinën e Islamit dhe xhamisë në këtë lagje të vjetër të Shkodrës. Njëkohësisht uroi të pranishmit për ditën e madhnueshme të përkujtimit të Vulës së të dërguarve, Muhammedit (a.s).

Myftiu i Shkodrës, Imam Ndriçim Sulejmani, u lut që aktivitete të tilla të organizohen edhe në të ardhmen sepse, sikurse theksoi, nxjerrin në pah vlerat e Islamit, mesazhet e të dërguarit Muhammed (a.s) dhe forcojnë rrallët e muslimanëve dhe harmoninë në mes tyre.

Në fund të këtij aktiviteti, thirrësi islam Muhamed Sytari i dhuroi Sheh Qemaludin Rekës, studiuesit Donato Martuccio dhe studiuesit Gëzim Uruçi, emblemën e xhamisë së Tophanës si kujtim i këtij organizimi me vlera.

Salavati në xhemat përmbi pejgamberin (a.s) uli siparin e këtij aktiviteti dhe kësaj xhumaje të veçantë, në xhaminë e Tophanës.

Ilir Dizdari, imam i xhamisë Tophanë