Muhamed Sytari

“Mos u dëshpëro, All-llahu është me ne!”

(E xhuma, më 18 dhjetor 2009) 

Nëpërmjet minberit të xhumasë në xhaminë e Tophanës, Imam Muhamed Sytari është ndalur në trajtimin e një prej momenteve më të rëndësishëm të Hixhretit të profetit Muhammed (a.s) në shoqërinë e Ebu Bekrit (r.a), nga Mekka në Medine.
“Ejani së bashku në një moment prej momenteve më interesante të Hixhres së Resulull-llahit, për të marrë pak dritë nga drita e besimit dhe për të fituar pak kënaqësi nga kënaqësia e shoqërisë së Resulull-llahit alejhis-salatu ves-selam. Ngjarja zhvillohet në një vend të vogël, ku mezi rrinë dy persona. Ngjarja zhvillohet në një shpellë të vogël ku është strehuar Resulull-llahi dhe shoqëruesi i tij Ebu Bekri, të cilët po largohen nga vendlindja e tyre drejt një vendi të përzgjedhur për të ndërtuar historinë! ”- filluar hytben e tij hatibi i Tophanës.
Më pas, ai ka theksuar se momenti më delikat i Hixhres ishte pikërisht në atë vend, teksa Ebu Bekri (r.a) frikësohej për jetën e profetit (a.s) dhe femohuesit mekas ishin më pranë se asnjëherë tjetër me të dërguarin. Aty, i dërguari i thotë shoqëruesit të tij: “Ç’mendim ke për dy persona, i treti i të cilëve është All-llahu?”. Pas kësaj ka ardhur përgjigjja e All-llahut: “Mos u dëshpëro, All-llahu është me ne!”. Ndër të tjera, hatibi i xhamisë Tophanë ka vijuar: “All-llahu është më të drejtën! All-llahu është me dritën! All-llahu është me udhëzimin! All-llahu është me të gjithë ata që i përkushtohen! All-llahu është me të gjithë ata të cilët sakrifikojnë çdo të shtrenjtë në jetën e tyre për lartësimin e Fjalës së Tij subhanehu ve teala! All-llahu është me të gjithë ata që kanë vendosur jetën e tyre në shinat e fesë dhe të besimit! Duhet që muslimani të ketë parasysh në jetën e tij këtë moment, më interesantin e Hixhres Nebevite Sherife!”

Kjo hytbe mund tw ndiqet edhe në youtube, në adresën:
http://www.youtube.com/watch?v=gkjdGtN_Q-s&feature=channel
 

V. Mehmeti