Muhamed Sytari

Mirë se vjen muaji i ndryshimeve!

(Ky muaj vjen për të na thirrur drejt suksesit dhe triumfit) 

Edhe një herë Ramazani vjen me mirësitë dhe begatitë e tij të shumta në meset tona.

Edhe një herë muaji i Kur'anit troket në dyert e muslimanëve, për t'u sjellë atyre nga Krijuesi i gjithësisë, lajmin e mirë të faljes, mëshirës dhe largimit nga dënimi i merituar…

Edhe një herë tjetër muaji i Kur'anit udhëzues për njerëzit, vjen për të sjellë me vete frymën e ndryshimit material e atij shpirtëror.

“Muaji i Ramazanit që në të (filloi të) shpallet Kur'ani, që është udhërrëfyes për njerëz dhe sqarues i rrugës së drejtë dhe dallues (i të vërtetës nga gënjeshtra)”.[1]

 

Muaji i ndryshimit material

 

Pasi në ditët e tij organizmi i njeriut hyn në një trajtim të veçantë e special, që do t'i shërbejë atij, për të fituar forca të reja për përballimin e vështirësive të ditëve në vijim.

Jo më kot Lukmani (a.s) e këshillonte të birin duke i thënë: "O biri im! Në rast se ti do ta mbingarkosh stomakun tënd me ushqim, atëherë mendimet tua do të flenë, do të zhduket nga koka jote gjykimi, e gjithashtu gjymtyrët e tua do të jenë të dobëta për të ushtruar adhurim". [2]

 

Muaji i ndryshimit shpirtëror

 

Pasi besimtari gjatë këtij muaji shton adhurimet e tij, shton këndimin dhe kuptimin e Kur'anit, vjen në xhami për të falur 20 rekatët e taravisë, takohet me vëllezër e të afërm në tryeza iftaresh e tubime dhikri, shtrin dorën e bamirësisë ndaj vëllezërve të tij nevojtarë dhe shumëfishohen shpërblimet për të mirat e shumta që vepron.

Të gjitha këto janë mundësi për të gjetur vetëveten e për t'u kthyer edhe më shumë se në ditët e tjera në natyrën e pastër me të cilën edhe jemi lindur, sikurse është transmetuar edhe në hadithin e Bukhariut nga Ebu Hurejra (r.a): "Çdo fëmijë (njeri)  lind me natyrë të pastër…".

E pikërisht duke medituar në mirësitë e këtij muaji dhe mundësitë e përfitimit nga mëshira e madhe e Krijuesit Fuqiplotë në ditët e tij, nuk ka se si të mos mendojmë për mundësitë e ndryshme për të ndryshuar diçka të keqe që posedojmë, në të mirë, për veten, familjen e ata që na rrethojnë!

Ky muaj vjen për të na thirrur drejt suksesit dhe triumfit, pasi është traditë e muslimanëve dhe specifikë e tyre që Ramazanin ta shfrytëzojnë për të korrur fitore e triumfe në fusha të ndryshme të jetës së tyre.

Dëshmitari më i mirë për këtë është vetë historia islame, e mbushur me këtë argument!

A nuk e keni dëgjuar të dashurin tonë, Pejgamberin (a.s), kur thotë në hadithin e transmetuar nga Bukhariu dhe Muslimi nga Ebu Hurejra (r.a), se: "Kur vjen Ramazani hapen dyert e xhennetit, mbyllen dyert e xhehnemit dhe lidhen shejtanët"?

Zakonisht jemi mësuar të themi pjesën sipërfaqësore të këtij hadithi fisnik, por a nuk jep të kuptojmë kjo shprehje pejgamberike se muslimani në këtë muaj duhet të rilidhë besën me Krijuesin e tij për tu angazhuar me punë të mira të cilat e bëjnë atë njeri të përfitojë xhennetin? Dhe çdo punë që ti vepron me të cilën do përfitosh xhennetin, është medoemos edhe një punë që do i vlejë edhe vetes, familjes dhe shoqërisë tënde!

Mirëpo sikur të kuptojmë të gjithë ne si muslimanë rëndësinë e këtij e hadithi, pastaj të përpiqemi, secili në sferën e tij, ta praktikojmë në jetë a nuk do jetë shoqëria jonë më e përparuar dhe vendi ynë më i fortë në të gjitha aspektet e jetës?

Sot kemi shumë nevojë të hapim dyert e "xhenneteve" tona për të përfituar edhe shoqëria jonë nga ato mirësi.

Të gjithë ne zotërojmë dhunti apo forca për të punuar edhe më mirë sesa punojmë çdo ditë, por mjafton të sakrifikojmë pak më tepër, që rezultatet e punëve tona të jenë edhe më të mëdha.

Ndërsa për pjesën e dytë të hadithit, mund të themi fare mirë se dyert e xhehnemit mbyllen dhe ti si musliman duhet të luftosh sa të kesh mundësi me veten tënde që të mbyllësh dyert e të keqes vetiake e asaj shoqërore si pasojë, gjatë këtyre ditëve e në vazhdim, për të ndryshuar diçka negative në rrethet tona!

Duhet të përpiqemi sa të mundemi të mbyllim dyert e "xhehnemit" intelektual, politik, informativ, ekonomik e atij social në shoqërinë tonë, në mënyrë që ajo të përparojë edhe më shumë e të avancojë çdo ditë!

 

Po, vëllezër!

 

Ne duhet të mundohemi që me ardhjen e këtij muaji të mbyllim dyert e "xhehnemeve" të ndryshme në shoqërinë tonë.

Për ta konkretizuar mendimin, them: Mediat informative, të lexuara e të shkruara, mund të mbyllin shumë mirë dyert e "xhehnemeve" të lloj-llojshme në ekranet apo faqet e tyre.

Tregtarët të mbyllin dyert e "xhehnemeve" ekonomike, duke lëshuar sadopak në fitimet e tyre, në ndihmë të individëve të varfër të shoqërisë tonë të pastabilizuar!

Të largojnë asortimentet e ndryshme të ndaluara, që kafshata e fëmijëve të jetë e pastër, që ata të rriten të pastër dhe shoqëria të zhvillohet e pastër e më pas edhe atdheu ynë të qëndrojë i pastër e i begatë!

Politikanët të mbyllin dyert e "xhehnemeve" të tyre politike, duke hapur dyert e komunikimit  ndërtues me masën, paralelisht duke mbyllur edhe masa dyert e "xhehnemit" të mosrespektimit dhe mosinteresimit për drejtuesit e saj, duke hapur dyert e sinqeritetit me bijtë e saj drejtues!

 

Atëherë, motër muslimane dhe vëlla musliman!

 

Le të përfitojmë nga hapja e dyerve të xhennetit dhe mbyllja e dyerve të xhehnemit, në këtë muaj, për të filluar reformat ndërtuese duke filluar nga vetvetja dhe shoqëritë tona, larg intrigës, fjalëve të pavlera dhe veprimeve të dështuara!

Ndërsa nga lidhja e shejtanëve të përfitojmë për të lidhur edhe ne egoizmat dhe hipokrizitë, interesat në llogari të tjerëve dhe kurthet shkatërruese, që frymëzohen nga vetë shejtani!

Le të lidhim egoizmin, që shkatërron sinqeritetin, në mënyrë që shoqëria të mos vuajë më nga individët parazitë!

Le të lidhim hipokrizinë, sepse një ditë do paraqitemi përpara Krijuesit, e mashtrimet atë ditë nuk do kenë më vlerë!

Të lidhim smirën, inatin dhe xhelozinë verbëruese sepse ditët e kësaj bote janë të numëruara dhe çdo krijesë e ka një fund, e pranoi apo e refuzoi atë!

Të lidhim mospërfilljen ndaj njëri-tjetrit dhe të respektojmë çdo individ të shoqërisë tonë dhe mendimin e tij ndërtues, pasi ne jemi misionarë të ndërtimit, jo shkatërrimtarë!

Shoqëria jonë zotëron forca të jashtëzakonshme, që duke hapur dyert e "xhennetit", duke mbyllur dyert e "xhehnemit" e duke lidhur "shejtanët" e saj, mund të japin rezultate të jashtëzakonshme dhe dobiprurëse për krejt rrethet tona!

Ky pra, është një nga propozimet e dobishme të Islamit për ne, në këtë muaj të mirësisë hyjnore!

Edhe ne me plot sinqeritet e devotshmëri themi: "Mirë se vjen Muaji i ndryshimeve".

 

 

Muhamed Sytari

Thirrës islam, Shkodër