Muhamed Sytari

Mevlud madhështor në xhaminë e fshatit Bardhej

(Shkodër, më 7 qershor 2009) 

   Me qindra të rinj e të reja, besimtare dhe besimtarë muslimanë, kanë mbushur sot pasdite xhaminë e fshatit Bardhej, në aktivitetin e zhvilluar nga këshilli i kësaj xhamie, në përkujtim të hazreti Muhammedit (a.s) dhe misionit hyjnor me të cilin u dërgua si mëshirë për gjithësinë.

Në fjalën e tij të hapjes, imami i kësaj xhamie, z. Ilir Dizdari ka falënderuar të pranishmit për përgjigjen e ftesës dhe u ka uruar mirëseardhjen në këtë sofër besimi. Njëkohësisht, ai ka përshëndetur edhe praninë e hoxhallarëve të nderuar, të cilët i janë përgjigjur ftesës për të marrë pjesë sot në këtë aktivitet fetar.

Aktiviteti ka filluar me këndimin e një pjese kur’anore nga thirrësi islam Lavdrim Hamja, pasuar nga fjala e mbajtur nga H. Faik Hoxha, myfti i Shkodrës (1991-2003).

Në fjalën e tij, ai ka falënderuar organizatorët për aktivitetin në fjalë dhe ka nxitur të pranishmit për të shtuar sa më tepër lidhjen me Zotin, nëpërmjet adhurimeve, dhikreve ditore etj. Gjithashtu ka bërë thirrje për më tepër vëmendje ndaj edukimit të fëmijëve me respektin ndaj fesë dhe ndjenjën islame, shtimin e këtyre tubimeve dhe afrimit me xhaminë dhe mesazhet që ajo përcjellë në shërbim të brezave.

Më pas, thirrësi islam Muhamed Sytari, ka folur mbi vlerën dhe madhështinë e hz. Muhammedit (a.s) në këtë botë dhe në botën tjetër. Ai, ka përmendur argumente të bollshme që vërtetojnë dashurinë e All-llahut për të dërguarin e Tij dhe mirësinë me të cilën Krijuesi i gjithësisë na ka privilegjuar duke na bërë pjesë të ymetit të këtij të dërguari të përzgjedhur.

Pas salavatit me xhemat, ka përshëndetur edhe thirrësi islam Lavdrim Hamja, i cili ka këshilluar të pranishmit për të patur kujdes me besimin e tyre, të fëmijëve dhe moralin islam që duhet të përcjellë muslimani tek të tjerët.

Nëpërmjet tregimeve dhe argumenteve të ndryshme, ai ka tërhequr vëmendjen e të pranishëmve drejt moralit të muslimanit në marrëdhënie e tij me Zotin, të dërguarin dhe fenë islame.

Më pas teologu Alban Kali, ka kënduar disa pjesë mevludi, ilahi dhe salavate që janë përcjellur me shumë kënaqësi nga të pranishmit e panumërt që kishin tejmbushur xhaminë e fshatit Bardhej.

Me kërkesën e xhematit, ai ka kënduar edhe një pjesë kur’anore, me të cilën është mbyllur edhe aktiviteti në fjalë.

Në fjalën e mbylljes, imami i kësaj xhamie, ka falënderuar edhe një herë pjesëmarrjen e madhe të besimtarëve muslimanë të këtij fshati dhe ka uruar mbarësi e mirësi për ta dhe familjet e tyre.

Për të dytin vit radhazi, për të pranishmit është shtruar “darka e Resulull-llahit”, një traditë e nisur që vitin e kaluar në xhaminë e këtij fshati.

 

Lavdrim Hamja