Muhamed Sytari

Libri i ri i Imam Muhamed Sytarit

(“Dhe kthehet kjo hëna e re e Ramazanit...”) 

Ditën e mërkurë, më 23 dhjetor 2009, doli nga shtypi libri i ri i thirrësit islam Imam Muhamed Sytari, i titulluar: “Dhe kthehet kjo hëna e re e Ramazanit...”. Libri në fjalë është një përmbledhje e shërbesave fetare të kryera nga autori gjatë Ramazanit 1429/2008 në xhami të ndryshme të rrethit Shkodër dhe jashtë tij.
“Materiali që vjen  sot në dorë të lexuesit është në një farë mënyre një vijimësi e asaj pune të madhe shërbestare në rrugën e gjallërimit të jetës islame në vendin tonë, (sidomos në xhamitë e fshatrave, ku nevoja për një prezantim cilësor e kompetent i mësimeve të fesë tonë është më e madhe se kudo tjetër).
Angazhimet e Ramazanit 1429/2008, ishin të mbushura me shumë dashuri, përkushtim e motivim për të mos u ndalur në një rrugë të nisur me kohë, në një mision sa të lashtë aq të ri, në forcimin e besimit dhe elementëve të fesë islame në jetën e shoqërisë shqiptare. Një mision e një shpirt, për të cilët, shoqëria e jonë ka nevojë sot më shumë se asnjëherë tjetër..!
Xhami të shumta, besimtarë të panumërt, biseda fetare, takime intelektuale, iftare vëllazërore e ndërfetare, vase, hatme Kur’ani, mexhlise dhikri, namaze nate, duá me xhematet, hytbe xhumaje, hytbe Bajrami, shkrime në gazeta e revista, publikime në internet, intervista e mesazhe televizive etj, ishin elementët përbërës të këtij muaji të madhnueshëm, plot energji, muaj sakrifice, shërbimi e dashurie, që përveç pasurisë shpirtërore, u bënë edhe motiv nxitës për ditët postramazanore.
Kujtimet dhe refleksionet e këtij Ramazani, i mblodha dhe i rreshtova në faqet e këtij libri, me shpresën e mirë që të shërbejnë si shembull pozitiv për imamët, hatibët dhe të angazhuarit me seriozitet e siqeritet në shërbim të Thirrjes Islame në Shkodër e përtej saj.”- shkruan në parathënien e librit të tij të ri autori.
Në këtë libër, të ilustruar edhe me fotot e rastit, lexuesi do të ketë mundësi të përjetojë emocionet e netëve të madhnueshme të Ramazanit 1429, por edhe aktiviteteve të tjera të realizuara gjatë tij nga autori dhe bashkëpunëtorët e tij.
“All-llahut i lutem ta pranojë këtë punë prej meje dhe të ma kthejë shpërblimin e saj në ditën e gjykimit, atë ditë kur njeriu do të ketë nevojë më shumë se kurrë për një vepër të mirë të pranuar e një shpërblim të pëlqyer nga Zoti i gjithësisë! Amin, për hatrin e Zotërisë së bijve të Ademit!”- përfundon parathënien e librit të tij të ri Imam Muhamed Sytari.
Libri në fjalë është botim i Sh.b. “Progresi”, është redaktuar nga shkrimtari Xhahid Bushati dhe është botuar në shtypshkronjën “Volaj”, Shkodër.

www.muhamedsytari.net