Imam Muhamed Sytari

“Lehjei seadeti” në xhaminë e Tophanës

(Tophanë, më 26 shkurt 2010) 

Në një atmosferë të ngrohtë, nën shoqërinë e salavatit të vazhdueshëm, besimtarë të shumtë, frekuentues të xhamisë së Tophanës kanë patur mundësinë të prekin nga afër dhe të puthin në shenjë respekti dhe dashurie, atë që njihet si “Lehjei seadeti”, qimja e mjekrës së pejgamberit Muhammed (a.s), pas faljes së namazit të xhumasë së datës 26 shkurt 2010.

“Lehjei seadeti”, sikurse ka shpjeguar Haxhi Mithat Myftija, imam i xhamisë së Plumbit, njëkohësisht trashëgimtar i saj nga Hafiz Esat Myftija, nga Jusuf ef. Tabaku nga Hasan ef. Kllyçi, “ka mbërritur në vendin tonë para rreth 6 shekujsh, dhjetra vite para ardhjes së osmanëve në trojet shqiptare”. Ajo është trashëguar brez pas brezi në këtë familje dijetarësh, sikurse i ka shpëtuar zjarrit tragjik që shkatërroi shtëpinë dhe bibliotekën më të madhe islame të Shkodrës, atë të familjes Myftija në dhjetorin e vitit 1998. “Gjithçka ishte djegur. Në gërmadhat e shtëpisë sonë gjetëm edhe “Lehjei seadetin” të padëmtuar fare, njëkohë që gjithçka ishte shkrirë nga zjarri i madh! Ishte argument se as zjarri, as uji e as dheu nuk mund ta dëmtojnë gjurmën e të dërguarit të All-llahut”- ka thënë ai me shumë emocion.

Pas hytbes së xhumasë, në të cilën Imam Muhamed Sytari ka folur për mrekullinë e përmallimit të trungut të hurmës për pejgamberin (a.s), faljes së xhumasë dhe lutjes në gjuhën shqipe të drejtuar prej tij, të pranishmit e shumtë kanë patur mundësinë ta puthin këtë trashëgimi të shtrenjtë të profetit Muhammed (a.s) që ka mbërritur para shumë shekujsh në Shkodër.
Mevludi Sherifë i këtij viti ka qenë shumë i veçantë për besimtarët e xhamisë së Tophanës, për vetë faktin e prezantimit të kësaj gjurme profetike në mesin e tyre.

Ahmed Mahiri