Muhamed Sytari

“Sa i mjerë ky qytetërim bombardues..!”

(Shkodër, më 16 janar 2009 - Hytbeja e xhumasë në xhaminë e Tophanës)  

Porositë e profetit Muhammed (a.s) dhe të Ebu Bekrit (r.a) drejtuar ushtrive muslimane, para nisjes në beteja kundër jobesimtarëve, përballë agresioneve perëndimore në botën e sotme, kanë qenë epiqendra e hytbes së tretë të këtij fillimviti, në xhaminë e Tophanës.

Nëpërmjet fakteve, hatibi i kësaj xhamie, thirrësi islam Muhamed Sytari, ka treguar sesi i ka porositur profeti (a.s) ushtritë e tij, saherë niseshin për në beteja kundër jomuslimanëve. “Lufta, në këndvështrimin e Resulull-llahit ishte mjet, jo qëllim, në kundërshtim me realitetin e ushtrive moderne të supërfuqive të kësaj kohe, që nuk arritën ta drejtonin botën me paqe e qytetërim, por nëpërmjet “muskujve”, dhunës, bombardimeve, terrorit ushtarak e burgjeve famëkeqe, në të cilat shkelen në mënyrën më flagrante të drejtat e njeriut!”- ka thënë në fillim të hytbes së tij, Sytari.

“Nga Burejde (r.a), është transmetuar, se kur niste ndonjë betejë, profeti (a.s) i porosiste komandantët dhe ushtarët e tij me frikën e All-llahut, pastaj u thoshte: “Luftoni në emër të All-llahutm në rrugë të All-llahut! Mos u bëni të pabesë, as mos tradhëtoni! Mos masakroni e mos vrisni fëmijë…!”, sipas transmetimit të imam Muslimit, gjë që fakton realitetin njerëzor të ushtrive të tij në krahasim me kafshërinë e ushtrive bashkëkohore!”- ka vijuar Sytari në hytben e tij.

“Edhe Ebu Bekri (r.a), më i afërti dhe më i dashuri njeri me Resulull-llahin (a.s), kur nisi Usama ibni Zejdin (r.a) në betejën e parë pas ndërrimit jetë të pejgamberit tonë (a.s), ndër të tjera e porositi, atë dhe ushtarët e tij: “Mos tradhëtoni e mos mashtroni! Mos u bëni të pabesë, mos torturoni e mos masakroni! Mos vritni fëmijë të vogël! As plakun e moshuar, as gruan! Mos prisni pemët në lulëzim dhe mos i digjni ato! Mos i prisni pemët me fruta! Mos e vritni dhinë, as lopën as kaun, vetëm nëse keni nevojë për të ngrënë! Do të kaloni pranë disa njerëzve të mbyllur në tempujt e tyre; lërini në qetësinë e tyre!...” Ja, porositë e kalifit të parë islam dhe ja bombat izraelite që shkatërrojnë xhamitë e shtëpitë, që vrasin fëmijët, gratë e pleqtë, që djegin pemët e shfarosin gjelbërimin! Ja realiteti kafshëror i këtij mjerimi njerëzor në vitin 2009! Sa i mjerë njeriu i kësaj kohe, sa i mjerë ky qytetërim bombardues, sa i mjerë ky realitet! Sa nevojtar i mësimeve të Islamit njeriu i kësaj kohe dhe qytetërimi i tij!”- ka përfunduar hytben e kësaj xhumaje ai.

Në fund të namazit të xhumasë, thirrësi islam Muhamed Sytari, ka drejtuar të pranishmit, për të tretën xhuma radhazi, në faljen e namazit të xhenazes në mosprezencë, për shehidët e pafajshëm të agresionit izraelit në Gaza të Palestinës.

Ahmed Mahiri