Muhamed Sytari

Gëzuar Kurban Bajramin!

(Shkodër, më 08 dhjetor 2008) 

Dita e hënë, më 8 dhjetor 2008, ishte ditë e madhe feste dhe gëzimi për mbarë muslimanët e botës. Sëbashku festohej dita e parë e Kurban Bajramit.

Edhe në xhaminë e Tophanës, me qindra besimtarë (jo vetëm nga kjo lagje), kishin mbushur haremin e saj, që në momentet e para të thirrjes së ezanit të sabahut, faljen e të cilit e drejtoi thirrësi islam Muhamed Sytari, vaiz-hatib i kësaj xhamie. Falja e namazit u pasua nga virdet e tij dhe lutja me xhemat.

Pas saj, hatibi i kësaj xhamie, iu përgjigj disa pyetjeve të drejtuara nga xhemati, pyetje që kanë të bëjnë me përditshmërinë e adhurimit të tyre, marrëdhëniet me Kur’anin Famëlartë, përfitimin apo jo nga kamata etj.

Këndimi i sures “Jasin”, shoqëruar me komentimin e disa ajeteve të saj, ishte një pjesë e rëndësishme e tubimit madhështor të Kurban Bajramit në xhaminë e Tophanës.

Me afrimin e kohës për faljen e namazit të Bajramit, në pozitat e imamit, hatibi i kësaj xhamie, orientoi të pranishmit sesi falet namazi i bajrameve dhe me “All-llahu ekber”, filloi rekatin e parë të këtij namazi.

I shoqëruar nga tekbiret, ai hipi në minber, prej nga hodhi dritë rreth vlerave, dobive dhe mesazheve që përcjell tek ne Dita e madhnueshme e Kurban Bajramit.

Njëkohësisht, ai u bëri thirrje të gjithë atyre besimtarëve që kanë mundësi ekonomike për të bërë kurban, të mos neglizhojnë me këtë detyrë të dobishme fetare islame, për vete, për familjen, miqtë e shoqërinë në tërësi.

Në fund të hytbes, ai u lut për mbarësinë e të pranishëmve, për drejtuesit e këtij vendi dhe prijësit fetarë shqiptarë.

Urimet dhe përqafimet e kësaj dite festive, ia shtuan edhe më shumë hijeshinë dhe bukurinë xhamisë së Tophanës në këtë mëngjes të ri të kësaj dite plot mesazhe besimi, sakrifice e bamirësie.