Muhamed Sytari

Nga kujtimet me hoxhën tim Shejkh Vehbi S. Gavoçi

(me u afru me të gjithë ata që drejtohen nga Kibla jonë e falin namazin tonë) 

Sigurisht, për të shkruar këta fragmente të begata, nga kujtimet e mia me Shejkh Vehbinë, Zoti e shpërbleftë për të mirat e tija ndaj meje dhe ndaj muslimanëve me shpërblimet e Tija, do të më dhurojë një kënaqësi të madhe, pasi do të hyj në një botë plot emocione, dashuri, mirësi dhe sinqeritet, sepse kjo është gjëndja e atij që hyn tek njerëzit e sinqertë, që mbajtën besën e dhënë All-llahut (xh.sh). Do të mundohem që mos të jem xheloz deri në atë masë sa t'ju ndaloj kënaqësinë e kujtimeve të mija me hoxhën tim, në vite! Kjo për shkakun se është një mirësi hyjnore, që duhet shpërndarë ndër njerëz, që të kënaqen me flladet e dashurisë së pastër dhe begatisë së qëndruarit nën hijen e shoqërisë së njerëzve të mirë!

Ejani me mua t' ju tregoj disa nga këto kujtime…

 

Edukata me Zotin, Krijuesin e Gjithësisë

Një ditë, kur po e vizitoja tek shtëpia e Zekajve, e gjeta duke ecur në tokë këmba- dorasi… Mendova se mos bën ushtrime gjimnastikore, megjithatë menjëherë më erdhi një dëshirë e madhe për ta pyetur dhe me ndrojtje i thashë: "Çfarë po bën Haxhi Vehbi"?

Me shumë qetësi ma ktheu:

"Po mbledh ndonjë nga qimet e mjekrës që më kanë rënë në tokë, sepse Zoti (xh.sh) e ka nderuar njeriun dhe nuk është mirënjohje ndaj Tij (xh.sh), që t'i lëmë nëpër tokë pjesët e ndryshme të këtij krijimi të mrekullueshëm"!

 

Kush drejtohet nga Kibla jonë dhe falë namazin tonë, është prej nesh

Fakt interesant është, se më tepër se një herë në takimet e mia private me të, Haxhi Vehbiu më porosiste: "Kujdes mor djalë nga ata që duan të mënjanojnë fenë tonë të drejtë, duke futur grindje e përçarje në mes të besimtarëve. Kur të ktheheni në vendin tuaj, mundohuni me u afru me të gjithë ata që drejtohen nga Kibla jonë e falin namazin tonë, se ky është besimi i ehli sunneti vel xhemaas. Ju kanë ndarë në Muslimanë, Bektashi, Rrufai, Tixhani, etj. Të gjithë gabojmë, por ajo që na kthen në rrugë të drejtë është Kur'ani Famëlartë e Synneti i Pejgamberit (a.s) . Atyre kthehuni dhe jetoni sëbashku për të mirën e fesë, se jemi vëllezër. Kujdes nga ata që mundohen t'ju luftojnë në emër të Islamit, si Bahaitë, Ahmeditë[1], etj….".

 

Respekti për dijen dhe librin

Po vizitonim sëbashku bibliotekën e vjetër të Myftinisë Shkodër. Kur hymë brënda në dhomën e librave u habit dhe njëkohësisht shenjat e mërzisë për gjendjen e atyre librave, u duken të qarta në fytyrën e tij të ndriçuar… Filloi të kërkonte dhe të shfletonte dhe sa herë që gjente ndonjë libër interesant, më thoshte:

"Ky është libër i mirë mor djalë…". Mbas përreth një ore, mbaruam punën. I solla një shishe me ujë të pastër për të shplarë duart, që kishin marrë me vete pluhurin e librave… I thashë: A të hedh ujë për të larë duart?

Më shikoi në sy për pak çaste, pastaj përplasi duart duke thënë:

"Hadha ghubarul- ilm", që do thotë:  "Ky është pluhuri i dijes", pastaj buzëqeshi dhe tha: "Mirë mor djalë, më hidh"!

 

Nga monografia e thirrësit islam Muhamed Sytari:

“Vehbi Sulejman Gavoçi- dijetar nga dijetarët e ymmetit”, Prishtinë 2005.