Muhamed Sytari

Kaderi dhe namazi

(Shkodër, më 14 janar 2010) 

Të enjten, më 14 janar 2010, pas namazit të jacisë, Imam Muhamed Sytari ka vazhduar të komentojë hadithin e katërt nga dyzet hadithet e Imam Neveviut. Në dersin e tij, ai ka shpjeguar konceptin e kaderit në jetën e muslimanit. “Kaderi është një ndër mirësitë më të mëdha me të cilat na ka pajisur All-llahu, duke na treguar se jemi në dijen, përkujdesjen dhe mirësitë e Tij”- ka përmendur ai. Gjithashtu ai ka shpjeguar se: “Fakti se All-llahu di çdo gjë për ne, nuk ndikon në përzgjedhjen tonë të veprimeve që bëjmë, sepse dija nuk është cilësi ndikuese në mënyrën e veprimit!”.
Ndërkohë, ditën e xhuma, më 15 janar 2010, Imam Muhamed Sytari ka folur mbi vlerën e namazit në raport me forcimin e identitetit të muslimanit. Ai ka nxitur “kulturën e namazit” në jetën e përditshme të muslimanëve shqiptarë. “Përse tregtari musliman shqiptar nuk e mban një sexhade me vete në punishten, dyqanin a zyren e tij, për të kryer obligimin e tij ditor? Përse, nuk e mbyll dyqanin e tij dhe të shënojë te dera: “Jam në xhami”, që të kuptohet se jemi shoqëri islame!?”
Pas namazit të xhumasë, besimtarët janë ftuar të kontribuojnë për restaurimin e pjesës së vjetër të xhamisë Tophanë.

V. Mehmeti