Imam Muhamed Sytari

Islami dhe paqja

(Islamin e vërtetë nuk e refuzon njeri) 

Shejkh Ahmed Keftaro

Islami, fe e paqes dhe e mëshirës

Paqja në Kur'an është përmendur më tepër se një herë.
All- llahu i thërret muslimanët duke u thënë: "O ju që besuat, hyni në paqen e tërësishme, e mos ndiqni rrugën e djallit, sepse ai është armik i juaj i hapët".[1]
Ndërkohë që i komunikoi Profetit Muhammed (a.s) vërtetësinë se: "E Ne nuk të dërguam ty (Muhammed) vetëm se mëshirë për të gjitha botërat".[2]

Sikurse e shohim në ajetin e lartpërmendur, Zoti (xh.sh) nuk thotë: Paqe, por mëshirë, sepse paqja ndodh në mes të dy armiqve me anë të një bese a armëpushimi, ndërsa mëshira ndodh në mes të nënës dhe fëmijës së saj.
Kjo është kultura që vjen nga Zoti (xh.sh), për shkak të së cilës dërgoi të dërguarit e Tij, vula e të cilëve ishte Muhammedi (a.s), për të ndërtuar njeriun e njerëzishëm, njeriun e plotë.

Islami erdh për të plotësuar misionet e Profetërve të mëparshëm, Ibrahimit, Musait, Isait, pasi Zoti (xh.sh) na përmend në Kur'an: "Ju (besimtarët) thuani: "Ne i besuam All- llahut, atë që na u shpall neve, atë që iu shpall Ibrahimit, Ismailit, Is'hakut, Jakubit dhe pasardhësve, atë që i është dhënë Musait dhe Isait dhe atë që iu është dhënë nga Zoti i tyre pejgamberëve, ne nuk bëjmë dallim në asnjërin  prej tyre dhe ne atij i jemi bindur".[3]

Kjo sepse All- llahu i Madhëruar nuk la popull prej popujve të botës, pa i dërguar një mësues: "Ne të dërguam ty me atë që është e vërtetë, lajmgëzues e qortues, e nuk pati asnjë nga popujt që nuk pati të dërguar".[4]
Kështu që në mësimet e Profetëve nuk ka kundërshtime e divergjenca, sikurse thotë edhe Profeti Muhammed (a.s): "Profetët janë vëllezër , feja e tyre është një dhe nënat e tyre janë të ndryshme"[5], sepse ata janë dërguar nga Një Zot i Vetëm, kështu që a logjikohet që Zoti (xh.sh) të zbresë misione të ndryshme divergjente me njëra- tjetrën?!
Së fundi në shekullin e 18- të doli në pah Ungjilli i Bernabës, në të cilin përmendet emri i Hz. Muhammedit (a.s), për të cilin All- llahu (xh.sh) në librin e Tij na përmend se: "e gjejnë të cilësuar (të përshkruar me virtytet e tij), te ata në Teurat dhe në Inxhil".[6]

Sikurse edhe vetë Profeti Muhammed (a.s) na sihariqoi se këto mësime do të mbërrijnë në të gjithë botën: "Kjo çështje do të mbërrijë aty ku ka mbërritur nata dhe dita"[7] dhe ne jemi dëshmitarë se Islami është përhapur nga lindja deri në Indi dhe në perëndim deri në Spanjë, saqë disa nga studentët tanë amerikanë më lajmëruan se në Amerikën Jugore janë gjetur disa gjurmë islame mbi të cilat është gdhendur: “Nuk ka triumfues përveç All- llahut”, gjurmë të cilat i kam parë të gdhendura edhe në muret e xhamisë, kur vizitova Endeluzinë.

Kur'ani, mesazhi i Zotit për të gjithë njerëzit

Duhet që ju, vëllezër, ta lexoni librin e All- llahut, Kur'anin, të zbritur Muhammedit (a.s), për të cilin Zoti (xh.sh) thotë: "Ne ty (Muhammed) ta zbritëm librin (Kur'anin) me vërtetësi që është vërtetues i librave të mëparshëm (Teuratit dhe Inxhilit) dhe garantues i tyre".[8]
Kjo do të thotë se ky libër përfshin çdo gjë të përmbledhur në Teurat dhe në Inxhil, prandaj kushdo që e lexon Kur'anin, do të gjejë në të Hz. Musain (a.s) më shumë se 15 herë  dhe në çdo herë do të mësojë diçka të re rreth jetës dhe misionit të tij.
Po kështu edhe me Hz. Isain (a.s) dhe familjen e tij të nderuar.
 

Kuptimi i Islamit, një detyrim hyjnor

Vëllezër të nderuar!
Mundohuni ta kuptoni Islamin në mënyrë të saktë, pasi kushdo që e ka provuar mjaltën, nuk mund t'i dalë njeri në botë që të mbjellë dyshimin në zemrën dhe mendjen e tij, se ajo është e hidhur!

Në shekujt dhe vitet e kaluara, u ngritën qeveri dhe organizma të ndryshme për të luftuar Islamin, por rezultati i tyre ishte sikurse na e përmend Zoti (xh.sh) në Kur'an: "Ata përpiqen me gojët e tyre ta shuajnë dritën e All- llahut"[9], por a ka forcë në botë që mund të shuajë një dritë që Vetë Zoti (xh.sh) e ka ndezur, për t'i ndriçuar me të njeriut jetën e tij?!

Kështu që çdo muslimani i del për detyrë që të jetë musliman i vërtetë, duke mos gënjyer, duke mos e thyer besën e dhënë dhe duke i kryer amanetet e mbartura mbi supe, sepse Profeti (a.s) thotë: "Shenjat e hipokritit janë tri: Kur flet gënjen, kur premton s'e mban atë dhe kur jep besën tradhëton".[10]

Këto mësime, Zoti (xh.sh) i zbriti dhe zgjodhi për to një njeri analfabet që nuk lexonte as nuk shkruante, të cilin Zoti (xh.sh) e futi në shkollën e Tij dhe i inspiroi që të largohej prej njerëzve gjë të cilën e bëri duke u veçuar prej tyre në shpellën Hira.
Aty i vetëm, iu shfaq Xhibrili (a.s), ambasadori i Zotit te Profetët e Tij, i cili i solli shpalljen e parë hyjnore: "Lexo me emrin e Zotit tënd, i cili krijoi (çdo gjë)"[11], e cila do të shënonte edhe ditëlindjen e një revolucioni shkencor, edukativ e moral të paparë në historinë njerëzore.
 

Islamin e vërtetë nuk e refuzon njeri

Sot, në kohët moderne, ndonëse njeriu ka përparuar në teknologji dhe zbulimet shkencore, ai vazhdon të jetë ateist duke e menduar veten mbret të çdo gjëje.
Kjo për arsye se njeriut i është prezantuar njohja e Zotit në mënyrë të shpifur.
Por, me siguri e them se nëse do të bëhej e mundur që këtij njeriu t'i prezantohej vërtetësia e mësimeve hyjnore, të pastra ashtu sikurse zbritën nga qielli, njerëzia do të jetonin vëllezër të njëri- tjetrit e me dashamirësi, veçanërisht në këtë kohë, kur bota është afruar dhe mesazhi i Zotit mund të mbërrijë gjithandej.

Kryerja e detyrimit hyjnor

Njerëzit, i luten All- llahut për jetëgjatësi dhe sado që rritet mosha e njeriut, forca e tij zvogëlohet, shenjë që tregon se njeriu po i afrohet largimit nga bota.
Por, ka edhe shenja të tjera që vërtetojnë këtë, si zbardhja e flokëve -sikurse më shihni mua-, por falë Zotit, qëkur kam zënë mend, me mirësinë e Zotit dhe me edukimin e babait dhe mësuesit tim, kam mësuar Kur'anin përmendësh dhe mësova Islamin në mënyrë të plotë dhe më pas hapëm medrese e Fakultete për studentë nga çdo anë e botës.

Prandaj i lutem All- llahut që ta kem kryer detyrën hyjnore, sikurse duhet që secili prej jush të kryejë këtë detyrë hyjnore që e gjithë bota të bëhet një shtëpi e vetme, jo sipas mendësive të disave, por sipas urdhëresës së All- llahut (xh.sh) në gojët e Profetëve të Tij, për t'u bërë njeriu vëlla i njeriut e mëshira të mbulojë botën mbarë.
Ju jap sihariq se realizimi i këtyre kuptimeve nuk është i largët, por duhet që secili prej jush të përgatitet për të zbatuar fjalët e All- llahut (xh.sh), I cili e krijoi njeriun në formën më të bukur dhe i mësoi atij të folurit e sqarimin,"E krijoi njeriun. Ia mësoi atij të folurit (të shprehurit, të shqiptuarit)".[12]

All- llahut i lutem që të na e bëjë të mundur të kuptojmë mënyrën e leximit të librit të Tij, fjali- fjali e fjalë- fjalë, e që pasi ta kemi lexuar të kemi përfituar ne dhe bota mbarë dhe të gëzojmë së bashku me mësimet e Krijuesit të tokës, qiellit dhe galaktikave.
Sikurse i lutem Atij të na japë mbarësi për të vepruar sipas pëlqimit dhe dëshirës së Tij!
Amin!

Përktheu nga arabishtja
dhe përshtati në shqip
Muhamed SYTARI

[1] El- Bekare: 208.
[2] El- Enbija: 107.
[3] El- Bekare: 136.
[4] Fatir: 24.
[5] Transmetuar nga Ahmedi në Musnedin e tij nga Ebu Hurejra (r.a).
[6] El- A'rafë: 157.
[7] Transmetuar nga Ahmedi dhe Tabaraniu nga Temim Dariu (r.a).
[8] El- Maide: 48.
[9] Et- Teube: 32.
[10] Transmetuar nga Bukhariu dhe Muslimi.
[11] El- Alek: 1, 2.
[12] Err- Rrahman: 3, 4.