Muhamed Sytari

Intervistë në Tv1 Channel

(Shkodër, më 7 korrik 2008) 

  Thirrësi islam Muhamed Sytari ka zbardhur për herë të parë imtësi nga jeta personale, vitet e studimit në Damask, krijimtaria fetare dhe pjesë kulmore nga veprimtaria e tij në shërbim të Thirrjes Islame në vendin tonë, në studion e Tv1 Channel, në emisionin e gazetarit Ergys Bamçi, “Mulliri i mëngjesit”.

   Gjatë kësaj interviste të dendur, ndër të tjera Sytari ka komentuar edhe dhjetë librat e tij të deritanishëm, duke hedhur dritë mbi personazhet e tyre, shkaqet e botimit të secilit, përpjekjet e vazhdueshme në rrugën e krijimtarisë fetare etj.

   Mjaft interesante ka qenë edhe komentimi i fotografive personale të tij, duke filluar nga mosha e vogël, vitet e studimit, pjesëmarrja në aktivitetet e ndryshme ndërkombëtare, rajonale e lokale e deri tek pozimet me personalitete të njohura në rrafsh ndërkombëtar e kombëtar.

   Me interes është ndjekur edhe vështrimi i tij mbi bashkëjetesën ndërfetare në vendin tonë, pasi gazetari shprehu befasinë e tij pozitive rreth pjesëmarrjes së klerikëve të shumtë, përfaqësues të komuniteteve fetare të krishtera, në promovimin e librit të tij të fundit, “Ve alejkes-selam...”.

   Në fund të intervistës së tij, thirrësi islam i ka dhuruar bibliotekës së këtij emisioni serinë e plotë të botimeve të tij.