Imam Muhamed Sytari

“Dielli i perëndimit”- në gjurmët e Imam Mehdiut

(Tiranë, më 30 janar 2010) 

Me kënaqësi e prita ftesën e Sheh Qemaludin Rekës për të referuar në këtë aktivitet, ku është përzier shpirti i Kur’anit, drita e Resulull-llahit dhe dashuria e Ehlibejtit me elementë të rëndësishëm të harmonisë tonë islame që rrezatojnë ndriçim besimi edhe mbi harmoninë kombëtare të vendit tonë, harmoninë e çdo vendi!

Libri “Dielli i perëndimit”, me autor Muhammed Reza Hakimi, i përket një trashëgimie të vjetër e të dendur fetare lslame, asaj shiite. Në këtë aspekt, mund të them se ky libër i shtohet bibliotekës ndërislame në gjuhën shqipe, në morinë e panumërt të trashëgimisë sonë islame ndër shekuj.

Mendimi im personal është se sot, ndonëse jetojmë në kohëra diversiteti, duhet të jemi të kujdesshëm me diversitete të ndryshme fetare që mësyjnë vendin tonë në momente thuajse injorante në raportet e njerëzve të politikës dhe të fesë tek ne, me vetë diversitetin fetar dhe realitetet e kohës!

Thelbi i librit që po promovojmë sot, sillet rreth personalitetit të një trashëgimtari të profetit Muhammed (a.s), në fundin e botës, për të cilin bëhet fjalë në disa hadithe profetike. ku mund të përmend:

-“Nuk do të shkojë kjo botë derisa t’i zotërojë arabët një burrë nga familja ime, emri i të cilit i ngjan emrit tim”- (Tirmidhiu nga Ebu Hurejra).

-“Po të mos mbetet nga kjo botë, qoftë edhe një ditë, do të dërgojë All-llahu një burrë nga familja ime, që do ta mbushë botën me drejtësi, pasi të jetë mbushur me zullume e prapësi”- (Ebu Davudi nga Aliu).

Duke lexuar librin në fjalë, më lejoni të ndalem në disa stacione brenda tij, për të përfituar disa vlera shpirtërore, morale, sociale, politike e materiale nga të cilat mund të përfitojë lexuesi i tij, nga burimi i njeriut të drejtësisë.

1. “Përveç imamëve të pastër, dijetarëve, historianëve dhe transmetuesve shiitë të haditheve, gjithashtu edhe shumë prej historianëve dhe transmetuesve nga ehli suneti, kanë pohuar këtë fakt (ardhjen e Mehdiut -M.S.-), të cilin e kanë konsideruar një realitet”[1]
Dr. Jusuf Karadavi, thotë: “Për Mehdiun e pritur ka hadithe të ndryshme, ku të sakta, ku të dobëta, ku të shpikura. Në tërësinë e tyre ata na drejtojnë nga kjo e vërtetë e pamohueshme, besimin e së cilës e kemi vaxhib- detyrim fetar! Po kush është Mehdiu? Ai, sipas teksteve të hadithit, është një burrë që do të gjykojë me sheriatin islam, duke e mbushur tokën me drejtësi pasi të jetë mbytur nga zullumet e prapësitë”[2]
Shejkh Abdulhalim Mahmud, shejkhul-ezher, thotë: “Ai do të dalë në Mekë, para Mesihut të pritur, hz. Isait (a.s). Ai do të vazhdojë të drejtojë muslimanët deri sa të zbresë Mesihu që do të gjykojë me ligjet e Muhammedit (a.s)”[3]
Muhadithi i shquar Abdullah Siddik el-Gummari, thotë: “Hadithi i Mehdiut është mutevatir, i transmetuar nga rrugët e 30 sahabëve me senede të ndryshme. Për qënien e tij mutevatir kanë folur edhe Ebul-Husejn es-Sixhzijj, Imam Kurtubiu, Ibni Haxheri, Imam Sakhaviu etj.”[4]

2. “Gjatë pushtetit të Mehdiut, do të shkatërrohet dhe shfaroset pushteti i despotëve dhe arrogantëve, si dhe influenca politike e hipokritëve dhe e tradhëtarëve”[5]
Dhe ky është një sihariq për mbarë botën që noton dita-ditës në ujërat e zullumit dhe degjenerimit. Por, më shumë se një sihariq, ai është një tërheqje vëmendje për secilin musliman, se detyra dhe misioni i tij (dhe i tyre) është ngritja e shtetit të së drejtës, mirëqenies, barazisë e harmonisë, jo misioni i servilizmit injorant para duarve të atyre që mbi Zotin, kanë interesa xhahile e të përkohëshme! Muslimanët e sotëm, dhe në çdo kohë, duhet të jenë aktivë në jetën e përditshme, të aftë për të mbrojtur vlerat dhe dinjitetin e tyre fetar që qëndron mbi çdo vlerë e dinjitet!
Është një thirrje hyjnore që secili prej nesh të jetë Mehdiu i kohës së tij, duke mos u thyer në rrugën e besimit dhe lartësimit të tij para asnjë zullumi a zullumqari me pozitë!

3. “Në kohën e qeverisjes së Mehdiut, të gjithë njerëzit do të arsimohen dhe do të nxënë dituri, deri dhe gratë nëpër shtëpitë e tyre do të gjykojnë sipas Kur’anit dhe sunetit të profetit Muhammed (a.s)”[6]
Po lexoja disa aspekte nga jeta e dijetarit të shquar damasken Ibni Asakir (499-571). Gjeta se nga 1300 mësuesit dhe dijetarët prej të cilëve kishte mësuar, 80 e ca ishin dijetare, gra![7]
Sot, në Shqipërinë e harmonisë ndërfetare dhe politikave dhe politikanëve pa vlera morale e shpirtërore, një vajzë e re muslimane, e talentuar, e ditur nuk lejohet të jetojë me dinjitetin e saj si muslimane shqiptare, duke u penguar nga derdimenët e kohës tonë për të punuar e për të kontribuar aty ku është e aftë e ku duhet të rrezatojë dijen dhe qytetarinë e saj! Pse? Sepse mban hixhab, sepse është e ndershme, e drejtë!?

4. “Kur të vijë Mehdiu, pasi të lerë pas shpine vështirësitë dhe luftërat, do të zhdukë dhunën dhe shtypjen dhe mbi gjithë tokën do të sundojë drejtësia. Asnjë vend në tokë nuk do të mbetet pa drejtësi. Nga kjo drejtësi dhe mirësi do të përfitojnë edhe kafshët”[8]
Kjo, më kujton hz. Omerin (r.a), babain e drejtësisë botërore, që qante nga frika se All-llahu do ta pyeste për një kafshë që devijon rrugën diku në Kufe dhe thyen këmbën e saj, se përse nuk ia ka shtruar rrugën!? Në vendin tonë sot, ndonëse ekzistojnë institucione që kanë për detyrë të mbrojnë kultet dhe vlerat e tyre kombëtare e fetare, 20 vite pas vitit 1991, xhamia e Plumbit në Shkodër vazhdon të mbytet në ujrat e degradimit të ndërgjegjes tonë kombëtare, fetare, politike e përtej tyre!

5. “Në kohën e Mehdiut toka do të jetë shumë pjellore dhe do të japë shumë prodhime sa që do të bëhen pirg sa një mal”[9]
E dini pse? Sepse Mehdiu do të thërrasë me gjuhën e gjyshit të tij, Resulull-llahit (a.s) që thoshte: “Ruajeni tokën, pasi ajo është nëna e juaj...”. Me fjalë të tjera: Kujdesuni për tokën, për pjellorinë e saj, për frutet e saj, për mirëqenien e saj!

6. “Mehdiu është dëgjues i halleve të popullit. Atë do ta dërgojë Zoti që t’i vijë në ndihmë zërit ankues të popujve të botës... Në tokë do të mbijnë bimë të shumta. Uji i lumenjve do të shtohet. Do të nxirren thesaret e fshehura nën tokë”[10]
Kushdo që e ka sadopak kulturë islame, do të kujtojë në këto momente hz. Nuhin, babain dytë të njerëzimit, i cili i kërkonte popullit të tij: “Kërkoni falje Zotit tuaj, se Ai vërtet falë shumë; Ai ju lëshon nga qielli shi me bollëk, ju shumon pasurinë dhe fëmijët, ju bën të keni kopshte dhe ju jep lumenj.”[11]
Edhe Mehdiu, me ardhjen e tij do të orientojë njerëzinë drejt marrëdhënies solide me Zotin, pas së cilës vjen mirëqenia, begatia, lulëzimi, mirsësitë e panumërta për njeriun dhe të ardhmen e tij!

Të nderuar pjesëmarrës,

Dje, tarikati Bektashi përkujtoi 800 vjetorin e dijetarit dhe murshidit të shquar islam, Haxhi Veli Bektashi, ndërsa sot, kryesia e tarikatit Rifai, po promovon këtë libër mbi Imam Mehdiun. Ndoshta është koinçidencë, por kur në një popull shtohet përmendja e miqve të Zotit, pritet falja, mëshira, begatia dhe mirësitë e Tij.
E, sot, më shumë se kurrë, në vendin tonë është e nevojshme të shtohet përmendja e miqve të Zotit që na marrin për dore drejt mirësive të Tij, në këtë botë e në të përtejmen!

Faleminderit!

Imam Muhamed SYTARI
Shkodër, më 30 janar 2010

Referati i mbajtur nga Imam Muhamed Sytari në simpoziumin e organizuar nga Mesxhidi i Ehli Bejtit mbi personalitetin e Imam Mehdiut, në “Tirana Internacional”, më 30 janar 2010

[1] Muhammed Reza Hakimi, “Dielli i perëndimit”, fq. 3.
[2] Dr.Jusuf Karadavi: http://www.islamonline.net/servlet/Satellite?pagename=IslamOnline-Arabic Ask_Scholar/FatwaA/FatwaA&cid=1122528618404
[3] Po aty.
[4] Po aty.
[5] Muhammed Reza Hakimi, “Dielli i perëndimit”, fq. 12.
[6] Po aty fq. 14.
[7] Abdulfettah Ebu Guddah, “Kimetuz-zemeni indel-ulema”, botimi i 10- të, Bejrut, 2002, fq. 96.
[8] Muhammed Reza Hakimi, “Dielli i perëndimit”, fq. 14.
[9] Po aty fq. 15.
[10] Po aty fq. 15.
[11] Kur’ani, Nuh, 10-12.