Muhamed Sytari

Ilahi dhe tekbire në xhaminë e Tophanës

(Shkodër, e xhuma, më 23 janar 2009) 

Xhumaja e katërt e këtij muaji, erdhi më e veçantë dhe plot atmosferë gëzimesh për frekuentuesit e xhamisë së Tophanës. Kjo për faktin se për herë të parë, ezanin e mesditës dhe atë të xhumasë e këndoi medresisti i vogël Erol Kuçi, nxënës në klasën e gjashtë në medresenë “Haxhi Sheh Shamia”. Kuptohet, të gjithë ishin të mahnitur nga pamja e medresistit të vogël që këndonte thirrjen e teuhidit, me pastërtinë e moshës dhe ëmbëlsinë e besimit.

Me zërin e tij melodioz e karakteristik, ai i emocionoi të pranishmit dhe meritoi plotësisht bekimet dhe urimet e tyre të përzemërta.

Njëkohësisht, pas namazit të xhumasë, që u drejtua nga thirrësi islam Muhamed Sytari, një grup medresistësh të klasës së gjashtë, kënduan për të pranishmit disa ilahi të bukura dhe tekbiret e bajrameve. Edhe xhemati i xhamisë Tophanë, mori t’I shoqëronte djemtë e medresesë në këndimin e tyre, duke i dhuruar xhamisë së Tophanës një atmosferë me të vërtetë të këndshme e të veçantë, si në një ditë feste, sin ë një ditë bajrami.

Të gjithë, i uruan me zemër medresistët e vegjël dhe i falënderuan për momentet plot emocion që i dhuruan në këtë ditë të gëzuar.

Në këtë xhuma, në xhaminë e Tophanës, prezantuan edhe drejtori i medresesë “Haxhi Sheh Shamia”, z. Kujtim  Dervishi dhe zv/drejtori i degës së vajzave të kësaj medreseje, z. Astrit Dervishi, të cilët ndanë me xhematin e xhamisë Tophanë kënaqësinë e kësaj dhurate të këndshme nga medresistët e vegjël.

V. Mehmeti