Muhamed Sytari

I dashur Imam Didmar!

(Shkodër, më 25 tetor 2009) 

   I dashur Imam Didmar,

   Fillimisht, i lutem All-llahut Fuqiplotë të jeni mirë me shëndet, ju, familja juaj, miqtë tanë të mirë, xhemati i dashur i “Greenway Masjid”.

   U gëzova shumë nga lajmet e fundit, për të cilat më njoftuat ditë më parë. Nëpërmjet tyre u shtua bindja ime se Islami po lulëzon dita-ditës në ShBA, kjo edhe falë punës dhe angazhimeve tuaja të sinqerta në shërbim të Thirrjes Islame, atje. Njëkohësisht u gëzova pa masë edhe për aktivitetet e ndryshme fetare që po organizoni, gazetën e re etj.

   Lajmi për konvertimin e tre të rinjve amerikanë në Islam, përpara xhematit të xhamisë tuaj, sikurse më tregonit në mesazhin e para disa ditëve dhe fotove shoqëruese, është dëshmitari më i mirë i kësaj bindje që forcohet moment pas momenti, lajm pa lajmi. Personalisht, të xhumanë e fundit, 2 tetor 2009, (nga vizita e muajit Ramazan), jam ndjerë shumë i lumtur në momentin kur vëlla Richard erdhi dhe deklaroi se kishte pranuar Islamin. Poashtu isha shumë optimist se edhe vëlla Brandon do ta pranonte shumë shpejt fenë tonë të pastër, gjë që ia komunikova drejtpërsëdrejti.

   All-llahu i Madhëruar e pranoftë besimin dhe sakrificën e tyre dhe i dhuroftë nga dashuria, mirësia dhe mëshira e Tij, për të jetuar muslimanë të devotshëm, me dinjitet e krenari, në shoqërinë amerikane!

   Ju përgëzoj me zemër për të gjitha arritjet dhe, All-llahu e begatoftë kohën dhe sakrificat tuaja, në rrugën e përhapjes së dritës islame atje, në Arizona e në ShBA.

   Selame të përzemërta të gjithë besimtarëve muslimanë në “Greenway Masjid”, vëllezërve shqiptarë, pakistanezë, indianë, amerikanë etj.

  
Ju përqafoj dhe ju uroj suksese të mëtejshme.

 

Përzemërsisht,

Muhamed Sytari