Muhamed Sytari

Hytbeja e parë e Ramazanit 1430, në xhaminë e Tophanës

(Shkodër, më 21 gusht 2009)

E xhumaja e sotme, ishte njëkohësisht edhe dita e parë e agjërimit të muajit Ramazan për këtë vit. Atmosfera e këtij muaji e gjeti xhaminë e Tophanës të tejmbushur nga besimtarët e shumtë që vinin për kryerjen e faljes së namazit të xhumasë, në ditën e parë të muajit të Kur’anit.

Hytbeja dhe namazi i xhumasë, u paraprinë nga dersi i xhumasë, mbajtur nga thirrësi islam Lavdrim Hamja.

Gjatë tij, ai nisi të shpjegonte dobitë dhe rregullat e agjërimit të Ramazanit sipas medh’hebit hanefi, bazuar në librin “Kushtet e Islamit”, të dijetarit Vehbi S. Gavoçi.

Ndërkohë, në hytben e parë të kësaj xhumaje, thirrësi islam Muhamed Sytari ka tërhequr vëmendjen e të pranishëmve drejt mirësive të shumta të këtij muaji, ndër të cilat ka përmendur: “mundësinë që i jepet njeriut për t’u kthyer në origjinën e tij hyjnore”.

“Mos të mendojë dikush se All-llahu ka nevojë për ndryshimin e orareve të ushqimit e pijes tonë, aq më pak për urinë e etjen tonë! Agjërimi i Ramazanit është një mundësi për t’u veçuar secili me Zotin e tij, në rrugën e ndryshimeve të mëdha shpirtërore dhe lartësimeve besimore”- ka thënë Sytari.

Gjatë hytbes së dytë ai ka ftuar të pranishmit për të dhënë kontributet e tyre në shërbim të xhamisë së Tophanës, thirrje të cilës ata i janë përgjigjur, si përherë, pozitivisht.

Gjithashtu, hatibi i kësaj xhamie, ka lajmëruar dhe ka ftuar të pranishmit se pas namazit të iqindisë së çdo dite të këtij Ramazani, në xhaminë e Tophanës do të organizohet Hatmeja Sherife e Kur’anit, si një traditë e re e kësaj xhamie.

 

V. Mehmeti