Muhamed Sytari

Hytbeja e xhumasë në xhaminë e Tophanës

(Shkodër, më 13 mars 2009) 

Në hytben e dytë të muajit mars, 2009, thirrësi islam Muhamed Sytari, ka vazhduar të flasë mbi fëmijërinë e hazreti Muhammedit (a.s) duke u ndalur në dy vitet e para të jetës së tij (a.s).

Nëpërmjet haditheve dhe transmetimeve të ndryshme, ai ka zbardhur elementë të rëndësishëm që vërtetojnë mrekullitë e shumta që shoqëruan lindjen dhe fëmijërinë e Zotërisë së bijve të Ademit, Muhammedit (a.s). Këtu, ai ka treguar për begatitë që mbuluan familjen e mëndeshës së tij (a.s), zonjës Halime Sadije, ndodhinë e hapjes së gjoksit nga melekët e dërguar, dialogun interesant në mes zonjës Halime dhe nënës së profetit (a.s), zonjës Amina në lidhje me hapjen e gjoksit të tij, etj.

Ndërsa në hytben e dytë të kësaj xhumaje, Sytari nuk lënë pa kritikuar edhe mefshtësinë e angazhimit për përkujtimin e lindjes së profetit (a.s), në mjediset shqiptare aktualisht.

“Boll me aktivitete shtatanike, të cilave u ka dalur boja, në përkujtim të lindjes së profetit tonë (a.s)! A nuk ka asnjë mënyrë tjetër për të përkujtuar profetin, vetëm me këndimin e mevludit të para 100 vjetëve, gjysmën e fjalëve të të cilit njerëzit nuk e kuptojnë e gjysmën tjetër ia humbasin “kënduesit” amatorë?! Boll me hoxhallarë e aktivistë emergjence, të cilëve u ka perënduar dielli pa u lindur mirë!”- ka thënë ai gjatë hytbes së dytë.

Pastaj, në vijim të këtij argumenti, Sytari ka ngritur zërin edhe për mosaktivizimin e duhur të teologeve të diplomuara në botën islame. “Deri kur do të vazhdojmë të shohim teologë që zënë vendin e teologeve? Si do ju dukej sikur dersin e ditës së Bajramit ta drejtonte njëra nga teologet e diplomuara njësoj si “teologët e grave”? Me siguri, do të na vinte e papritur!”- ka vijuar ai.

Në fund të hytbes, ai ka bërë ftesë për të kontribuar financiarisht për xhaminë e Tophanës, të cilës të pranishmit i janë përgjigjur pozitivisht, si edhe më parë.

www.muhamedsytari.net