Muhamed Sytari

Hytbeja e xhumasë në xhaminë e Tophanës

(Shkodër, më 8 maj 2009) 

Për të pestën xhuma me radhë, hatibi i xhamisë Tophanë, Muhamed Sytari ka vazhduar të flasë mbi veçoritë me të cilat Zoti Fuqiplotë e ka dalluar hz. Muhammedin (a.s) nga të gjithë të dërguarit e tjerë.

Në hytben e tij, ai është ndalur edhe në komentimin e propagandës antiislame të ditëve të fundit kundër hixhabit të muslimaneve të reja.

“Këmbanat e taborrave të Iblisit në Shqipërinë tonë, në ditët e fundit, bien kundër hixhabit tuaj, motra të nderuara. Por, ju duhet të jeni kryelarta në shoqërinë ku jetoni! Të jeni krenare që mbani hixhabin e nënës tuaj Hatixhe, vajzave të Resulull-llahit (a.s), grave të sahabëve, grave të ditura e të përkushtuara të historisë së njerëzimit! Ata, përpiqen dita-ditës, por të jeni të bindur se asgjë nuk mund ta ndalojë dot vullnetin e Zotit; lulëzimin e Islamit në këtë vend! Të shumta përpjekjet për ta fshirë identitetin islam të shqiptarëve, por më kot, përpjekje të dështuara!”- ka thënë ndër të tjera Sytari në hytben e tij.

Në vijim të htybes së tij, Sytari ka përmendur se ndër veçoritë me të cilat Zoti e ka veçuar profetin Muhammed (a.s) është se kushdo që bie një herë salavat përmbi të, Zoti bie dhjetë herë salavatë për atë person. Dhe ka vijuar: “Aty ku njerëzit bien salavat në vijimësi mbi pejgamberin (a.s), është garancia e All-llahut për mirëqenien dhe paqen e tyre! Aty ku njerëzit bien salavat në vijimësi mbi zotërinë e bijve të Ademit, nuk mund të ketë fatkeqësi si ato që dëgjojmë dhe lexojmë se ndodhin edhe në vendet më të zhvilluara të botës, zjarre, katastrofa natyrore, tufane etj! Edukoni fëmijët tuaj me salavatin mbi Resulull-llahin (a.s)! Edukoni familjet tuaja me përmendjen e emrit të Resulull-llahit (a.s)!”- ka vijuar ai.

V. Mehmeti