Muhamed Sytari

Hadithe, këshilla, urtësi

(Në brendësinë e librave të shumtë të bibliotekës së Hafiz Qamil Tresi) 

Në brendësinë e librave të shumtë të bibliotekës së Hafiz Qamil Tresi, në ditarin e tij, në arkivin familjar e në shumë shënime të tjera me shkrimin e dorës, të gjetura gjatë hulumtimit për këtë studim, do të gjejmë edhe shumë hadithe profetike, këshilla nga njerëz të ditur e urtësira nga më të ndryshmet, të cilat dëshmojnë për tiparet kërkimore dhe studiuese të këtij njeriu të ditur, kërkues në vazhdimësi të diturive.

   Duke lexuar pas rreshtave të lartpërmendur, është e pamundur të mos shikosh të dukshme fytyrën e një njeriu të etur për dituri, të një hatibi të preokupuar për përgatitjen e një hytbe xhumaje, të një vaizi në kërkim të argumenteve të shumtë, me të cilët do të ngrohë zemrat e dëgjuesve të tij dhe do të angazhojë mendjet e tyre për të menduar e medituar rreth tyre.

   Këto shënime të vyera i kam ndarë në tre grupe, në hadithe, në këshilla, në urtësira. Më poshtë po rreshtoj disa prej tyre, për efekt ilustrimi dhe me qëllimin që dikush nga vaizët, hatibët a kërkuesit e njohurive e urtësive islame, të përfitojë prej tyre.

 

Hadithe kudsijje[1]:

 

1. Thotë All-llahu (xh.sh): "Robi Im! Në se më përmend në vetmi, të përmendi në vetmi, e nëse më përmend në shoqëri, të shpërmendi në një shoqëri më të mirë se ajo".

2. Thotë All-llahu (xh.sh): "O bir i Ademit! Sa herë që të më përmendësh, më ke falenderuar e sa herë që të më harrosh, më ke mohuar".

3. Thotë All-llahu (xh.sh): "O bir i Ademit! Ngrihu drejt Meje, të eci drejt teje. Ec drejt Meje, të vrapoj drejt teje".

4. Thotë All-llahu (xh.sh): "O Muhammed! Ai që më beson Mua dhe nuk beson kaderin; të mirën e të hidhurën e tij, , le të kërkojë një zot tjetër pos Meje"

5. Thotë All-llahu (xh.sh): "Robi Im besimtar, është më i dashur te unë, se disa melekë".

 

Hadithe profetike:

 

1. Transmetohet nga Ibni Abbasi (r.a), se i Dërguari i All-llahut (s.a.v.s) ka thënë: "Do të hyjnë në xhennet, shtatëdhjetë mijë prej ymmetit tim, pa llogari".

2. Ka thënë Resulull-llahi (s.a.v.s): "Janë dy fjalë, të lehta në gojë, të rënda në peshore, të dashura për Mëshiruesin: Subhanall-llahi ve bihamdihi, subhanall-llahil-adhim".[2]

3. Ka thënë Profeti (a.s) : "Ia kaloi një dirhem, njëqind mijë (dirhemëve)".[3]

4. Ka thënë Profeti (a.s): "Gibet është ta përmendësh vëllanë tënd me diçka që ai e urren".[4]

5. Ka thënë Profeti (a.s ): "Mëshiruesit i mëshiron Mëshiruesi".[5]

6. Ka thënë Profeti (a.s): "Mëshironi ata që janë në tokë, t'ju mëshirojë kush është në qiell".[6]

7. Ka thënë Profeti (a.s): "Kur të vdesë njeriu do t'i ndërpriten  punët, përveç tri gjërave: sadekaja e vazhdueshme, dituria me të cilën sjell dobi, ose një fëmijë i mirë që lutet për të"[7].

8. Ka thënë Profeti (a.s): "Duaj për njerëzit atë që do për veten tënde".[8]

9. Ka thënë Profeti (a.s): "Nuk beson asnjëri prej jush derisa të dojë për vëllanë e tij atë që do për veten e tij".[9]

10. Ka thënë Profeti (a.s): "Sikur ta dinin njerëzit se çfarë ka në Ramazan, do të dëshironin që i gjithë viti të ishte Ramazan".

11. Ka thënë Profeti (a.s): "Zotëria i muajve është Ramazani dhe zotëria i ditëve është xhumaja".[10]

12. Ka thënë Profeti (a.s): "Shpejtojeni iftarin dhe vonojeni syfyrin".[11]

Ka thënë Profeti (a.s): "Hani syfyr, sepse në syfyr ka bereqet".[12]

13. Ka thënë Profeti (a.s): "Ai që e agjëron Ramazanin dhe e pason me gjashtë ditë nga Shevvali, është si të ketë agjëruar të gjithë vitin".[13]

14. Ka thënë Profeti (a.s): "Ai që merr abdes në mënyrë të duhur, pastaj vjen për të falur xhumanë, dëgjon (hytben) dhe heshtë, do i falen gjynahet e krejt javës".

15. Ka thënë Profeti (a.s): "Nuk qëndron dashuria e kësaj bote dhe dashuria e Ahiretit në zemrën e një besimtari, sikurse nuk rri uji dhe zjarri në një enë të vetme".

16. Ka thënë Profeti (a.s): "Besimi është lakuriq; rrobat e tij janë devotshmëria, frutet e tij dituria dhe stolitë e tij turpi".

17. Ka thënë Profeti (a.s): "Dhikri më i mirë është La ilahe il-lall-llah dhe duaja më e mirë është Elhamdu lil-lah".[14]

 

Nga monografia e thirrësit islam Muhamed Sytari:

“Hafiz Qamil Tresi- në gjurmët e një biblioteke që sfidon heshtjen e kohës”,

Shkodër, 2006.