Muhamed Sytari

Gruaja dhe Thirrja Islame

(Nga bashkëbisedimi me Shejkh Vehbi Gavoçin) 

Cilat janë kufijtë e një thirrësi islam në thirrjen e gruas në Islam?

 

"Në fenë tonë, gruaja është motra e burrit dhe kërkohet prej saj të besojë dhe të adhurojë si burri, siç është e kërkuar të ruajë zemrën, gojën dhe gjymtyrët e saj nga ato gjëra të ndaluara, ashtu si edhe burri. Thirrja e gruas në Islam nuk ka kufij, përveç atyre çështjeve që duhen studiuar në veçanti prej tyre. Prandaj edhe Pejgamberi (a.s) kishte caktuar ditën e enjte (siç thuhet) për t'u takuar me gratë e për t'u mësuar atyre fenë e Zotit (xh.sh)".

 

Çfarë vendi zë gruaja në thirrjen islame?

 

"Gruaja është gjysma e shoqërisë.  Ajo është djepi i burrave dhe grave të mira… Ajo është nëna e oficerit, presidentit, bujarit, dijetarit, punëtorit, fshatarit, etj. Gruaja është fabrikë e sjelljeve të mira, të njerëzve të ndershëm e të lartë. Ne e dimë shumë mirë, se në kohën e Pejgamberit (a.s), gruaja dilte për të falur edhe sabahun në xhami, sikurse merrte pjesë edhe në luftra duke ndihmuar për të mjekuar të plagosurit, për të gatuar, etj. Dimë po ashtu, se shumë prej tyre kanë qenë mësuese të shumë burrave të ditur.[1]

Është shumë mirë që femra, pas përgjegjësive ndaj burrit dhe familjes së saj të merret me misionin fetar në kuvendin e grave, pasi mund të jetë më e suksesshme në thirrjen e tyre se burri, për shkakun, se ajo si femër i njeh më mirë ndjenjat femërore, nevojat dhe mënyrat e të komunikuarit me to.

Sot në Siri, njoh një grua që ka me mijëra studente e nxënëse, madje edhe jashtë saj, si në Liban, Jordani, Amerikë, etj.

Edhe libri më i madh për jetën e Pejgamberit (a.s) i shtypur në gjashtë vëllime të mëdhenj, është shkruar nga një studente e asaj gruaje.

Sot kemi me qindra e mijëra gra me shkollë të lartë, që mësojnë Kur'anin përmendësh, mundohen të kryejnë me sukses punët që kanë, etj.".

 

Thuhet, se Islami e ka burgosur gruan me hixhabin e saj. Si e shikoni këtë pretendim, aq më tepër kur bëhet fjalë për një femër që u mëson të tjerëve fenë e tyre?

 

"Mbulimi i gruas përpara burrave të huaj është ligj edhe tek çifutët e kristianët! A i keni parë murgeshat, se si vishen? Mbulojnë çdo pjesë të trupit, përveç duarve dhe fytyrës. Atëherë, mbulimi i gruas është urdhëresë hyjnore dhe ata që flasin për mbulesën kritikojnë Zotin Krijues! Po kush me mend në kokë, mendohet ta kritikojë Krijuesin e gjithësisë, i cili di më mirë se çfarë vlen më shumë për krijesat e Tija të dobëta që vetë i ka krijuar. Atëherë ky pretendim del prej atyre që nuk kanë asnjë besim dhe nuk kanë mend në kokë dhe logjikë të shëndoshë! Ndërsa disa të tjerë nuk e kritikojnë mbulesën e gruas, por thonë fjalë të tjera, thelbi i të cilave është, se koha ka ndryshuar duke menduar se ligjet hyjnore janë si ato njerëzore që ndryshojnë me ndryshimin e temperamenteve e dëshirave. Këtyre njerëzve duhet t'u themi se, dija e Zotit (xh.sh) përfshin interesin dhe të mirën e njeriut sa të jetë kjo jetë, pasi Zoti (xh.sh) e di të kaluarën, të sotmen dhe të nesërmen me dije të plotë dhe pa mangësi në të! Pastaj le të flasim qartas: A ngihet burri me gruan e tij, njëkohë që shkon e vjen me gra të huaja, të zhveshura nga çdo moral e të zhveshura nga frika e Zotit (xh.sh)!?

Në Amerikë në çdo 3 minuta grabitet një femër…[2] Në Brazil, numri i fëmijëve pa prind ka arritur në 800 mijë, ku një pjesë e madhe e tyre jetojnë në stacione, fusha, etj. Në Amerikë 24% e fëmijëve janë të jashtëligjshëm. Në Francë 32%. Në Gjermani 34%. Në Panama 71%, etj. Në Amerikë, për çdo vit lindin më se 1milion fëmijë të paligjshëm. Mendo atëherë të ardhmen e Amerikës në moral e mirësjellje, me breza të tillë!?[3]

Nevoja e mashkullit për femër dhe anasjelltas është e natyrshme dhe natyra nuk ndalohet kurrë, por sillet dhe vendoset në një vijë të pastër e të drejtë që është lidhja martesore.

Kemi dëgjuar dhe vazhdojmë të dëgjojmë për abuzimet seksuale të priftërinjve në Amerikë që edhe pse në moshë të thyer, janë paditur disa herë nëpër gjyqe…Epshi i natyrshëm nuk mbytet edhe pse mosha e njeriut arrin 72 vjetët!?

Kthehem edhe njëherë tek pyetja juaj dhe them se tek ne, në Islam gruaja ka vendin e saj në tubimin dhe bashkimin me masën femërore dhe komunikimin me ta.

Le të dalin mësuese që mëson vajzat e fëmijët e vegjël, më mire se të bëhet inxhiniere fjala vjen. Le të bëhet edukatore e brezave, duke mësuar fëmijët për të qenë burrat e së nesërmes, më mirë se të merret me politikë fjala vjen. Ajo grua që është bërë prind dhe del për të punuar në një punë, të cilës i mjaftojnë burrat, kujt ia lëshon fëmijët e saj? Kujt ia dorëzon dritën e syve dhe loçkën e zemrës dhe a thua bëhet më pas shërbëtorja si nana?

O gra, ju kur punoni punët e burrave, ta dini se keni mbyllur derën e punës për disa burra dhe keni lënë njëkohësisht zyrën e shtëpisë pa një "nëpunëse" të aftë! Shkurt, mbulesa është ndihma e zemrës së pastër për me jetu jetë të pastër, pasi mbulesa nuk e ndalon femrën për t'u mësuar, për t'u shkolluar e për të arritur në gradë të larta të feminilitetit të saj.

Sa e sa vende të përparuara kanë sot nevojë për gra të specializuara në sëmundjet e grave? Në çështjet edukative kërkohet gruaja, po ku është ajo? Në kuzhinat e mëdha botërore punojnë meshkujt, grate ku janë? Të huajt e sakrifikuan gruan që në vend që të merrej me veten, familjen e fëmijët e saj, duke kënaqur burrin e duke u specializuar në lëmin e saj, zgjodhën për të përzierjen me burrat e huaj në punë, në rrugë e në shtëpi!?

Ti po lexon çdo ditë se ç'po pëson gruaja që po lë shtëpinë e saj, pallatin e saj e po sakrifikon jetën e saj natyrale, për t'u bërë kukulla e burrit dhe loja e tij dëfryese në shumë raste. .Ne e dimë se shumë femra janë të detyruara të punojnë punë të papërshtatshme për te, por edhe këtu u themi atyre që të armatosen me besim dhe të ruhen nga përzierja me burra të huaj, të ruajnë nderin e tyre dhe moralin e denjë për ta!

Gruaja europiane në shumë raste zbret nga fshati në qytet për të punuar punë të ndryshme e fitimprurëse.

Mirëpo duke lexuar librin "Çështja e gruas në peshore", shkruar në gjuhën arabe, do shohim se si e pëson gruaja perëndimore nga egërsia e burrit dhe përfitimi i tij nga mundi dhe djersa e saj.

Ata që thonë se gruaja muslimane rron në burg, ata vetë përfitojnë prej grave të tyre "të lira", derisa arrin kjo përfitesë edhe me nderin e saj! Në sa e sa vende të huaja femra kërcen nëpër kabare të ndryshme, duke shfaqur edhe pjesët e turpshme të trupit të saj?! Sa e sa gra janë përdorur për të prishur burrat, deri sa janë kthyer në prostituta? Prandaj atyre që flasin për mbulesën e gruas  u them të shikojnë në kohë, se kur është nderuar femra si nënë, motër, bashkëshorte, nuse djali e vajzë më tepër se sa sot? Sot që ajo bëhet ministre, por edhe pastuese rrugash, siç kam parë në vendin tim!? Sot kur femrat pastrojnë banjot, siç e kam parë këtë në Rumani!?

Sot kur femrat bëjnë hamallëk, duke mbajtur edhe hekura para duarve, siç i kam parë në Bullgari!? Vetëm në Islam femra ka gjetur të drejtat e saja dhe është nderuar, ashtu siç i takon dhe për këtë gjë dëshmon vetë historia"!

 

Nga monografia e thirrësit islam Muhamed Sytari:

“Vehbi Sulejman Gavoçi- dijetar nga dijetarët e ymmetit”, Prishtinë 2005.