Muhamed Sytari

Fjala e thirrësit islam Muhamed Sytari në promovimin e librit

(Shkodër më, 30 maj 2009) 

 

Fjala e mbajtur nga thirrësi islam Muhamed Sytari

në promovimin e librit “Rrugëtime të një hatibi”

 

Të nderuar pjesëmarrës,

 

   Libri “Rrugëtime të një hatibi”, është një përpjekje për të pajisur xhaminë shqiptare me një arkiv të gjallë të jetës së saj, në shërbim të brezave që do të vijnë pas nesh!

  Të gjithë jemi dëshmitarë që në një mënyrë a një tjetër taborrat e iblisit, nëpërmjet politikave të ndryshme dhe vekilëve të tyre, po përpiqen dita-ditës ta shveshin individin shqiptar nga identiteti i tij islam, me pretendime nga më të ndryshmet, shpesh qesharake.

  Kryqëzata e re ndaj Islamit, profetit Muhammed (a.s), Kur’anit Famëlartë dhe simboleve të ndryshme islame, edhe në vendin tonë, ka kohë që lëvron qetësisht në atmosferat e ndryshme të kësaj shoqërie. E, përballë kësaj roli i institucionit të Thirrjes Islame duhet të jetë më i organizuar se asnjëherë tjetër!

   Kur e pyeta njëherë hoxhën tim, Vehbi Gavoci se si e përfytyronte të ardhmen e Shqipërisë, m’u përgjigj: “E ardhmja e Shqipërisë…Ky është një problem, përgjigjja e të cilit është në Shqipëri, ndërkohë që unë jam larg saj. Por për pak kohë që kam qenë atje, kam parë dhe kam ndjerë për hapat e shpejtë e të shumtë për largimin e vendit tim nga Islami!… Nuk e di në ballë të kësaj prishje, ku janë Ulematë, intelektualët muslimanë, tregtarët muslimanë dhe muslimanët me pozitë? Megjithatë, shpresa në Zotin (xh.sh) për ta ruajtur fenë dhe karakterin në vendin tonë, është e madhë mirëpo si? Si do të përparojë vendi im dhe si do të përballojë armiqtë e vjetër, këtë nuk e di, pasi përsëri po them: Nuk jam atje”! Ne jemi këtu! Por si?

   Përgjigjja më e mirë e kësaj pyetje gjendet në zemër të librit që sot merrni në dorën tuaj!

   Më lejoni të përsëris përpara jush se: “Xhamia është një vend i rëndësishëm në jetën e muslimanit, është vendi ku ai kryen adhurimin më të rëndësishëm ndaj Zotit të tij, namazin, të cilin e shoqëron me lutje, dhikre të ndryshme etj.

   Që xhamia të ketë një funksion sa më të mirë dhe në mënyrë që ajo të shërbejë jo vetëm për kryerjen e namazit, por që të kthehet në një qendër të mirëfilltë edukuese me virtytet më të larta islame, shoqëruese e njeriut në jetën e tij, duhet medoemos të ketë një prijës të aftë e të devotshëm, të ditur e të urtë. Detyra e tij është që ta bëjë atë “pikënisje të jetës tonë, vendin e kërkimit të dashamirësisë ndaj njëri-tjetrit, vendin e studimit të çështjeve të jetës tonë, gjendjes tonë sociale, ekonomike dhe politike”.[1]   

   Vetëm në këtë mënyrë, kur xhamia jonë të ketë njeriun e standarteve të kërkuara, prijësin e aftë për të kuptuar realitetin dhe për të ditur mënyrën e “përkthimit” të mësimeve të fesë në jetën e përditshme të njerëzve, vetëm atëherë xhamia do të mund të jetë vendi më i rëndësishëm në jetën e një shoqërie, sikurse ishte..!”

   “Rrugëtime të një hatibi”, në të vërtetë, është edhe një thirrje e fortë për ndërgjegjësimin e faktorëve kryesorë të Thirrjes islame në këtë vend, për të vendosur mbi interesat personale, ato të Thirrjes Islame, kulturës dhe qytetërimit të saj!

 

   Faleminderit!