Muhamed Sytari

“Elhamdulil-lah, jemi muslimanë!”

(Shkodër, e xhuma, më 9 tetor 2009) 

Në një atmosferë të ngrohtë besimi e qytetarie, besimtarët dhe frekuentuesit e xhamisë Tophanë, kanë pritur thirrësin islam Muhamed Sytari, pas kthimit të tij nga vizita e bërë në Qendrën Islame Shqiptare Amerikane të Arizonës, gjatë muajit të Ramazanit dhe pas tij.

Në hytben e parë të xhumasë, pas kthimit nga ShBA, hatibi i xhamisë Tophanë, ka folur mbi vlerën dhe madhështinë e harmonisë dhe vëllazërisë së besimit në fenë islame. Nëpërmjet shembujve konkretë, ai ka rrëfyer një pjesë të eksperiencës së tij pozitive në mesin e muslimanëve të Arizonës, sidomos në xhaminë e shqiptarëve “Greenway Masjid”.

“Atmosferën e ngrohtë besimore dhe vëllazërinë islame që e gjeta në mesin e shqiptarëve të Phoenix, do ta tregoj përherë si një ëndërr reale, e jetuar në një hark kohor mëse njëmujor. Shqiptarë nga Dibra e Madhe, Kosova, por edhe nga shumë treva të vendit tonë, ata ditën të tregojnë shpirtin e vërtetë të fesë islame në jetën e përditshme dhe aktivitetet e xhamisë. Më vërtetuan, se pa Islamin shqiptarët nuk vlejnë një grosh! Më vërtetuan se pa shpirtin e kësaj feje të madhnueshme, ky vend dhe ky popull nuk do të kishte as tolerancë as harmoni as bashkëjetesë, me të cilat mburren politikanët tanë, si një vlerë “shqiptare”!?”- ka thënë ndër të tjera Sytari.

“Duhet ta falënderojmë All-llahun që na bëri prej muslimanëve! Kjo është mirësia më e madhe që na është dhënë nga Krijuesi i gjithësisë! Dhe, e kemi për detyrë që këtë mirësi ta ruajmë dhe ta konsolidojmë me dinjitet dhe krenari, përpara kujtdo që përpiqet ta nëpërkëmbë këtë fakt!”- ka vazhduar më tej hatibi i Tophanës në hytben e tij.

Në përfundim të xhumasë, besimtarët janë takuar me hatibin e tyre dhe në një atmosferë të ngrohtë i kanë drejtuar atij shumë pyetje rreth këtij udhëtimi.

Hytbeja e kësaj xhumaje është regjistruar dhe një pjesë e saj mund të ndiqet edhe në (youtube) në adresën:

http://www.youtube.com/watch?v=FxjLp7dDUmc

 

 

V. Mehmeti