Imam Muhamed Sytari

Edhe një javë nga përkujtimi i lindjes së Resulull-llahit (a.s)

(Tophanë, e xhuma, më 19 shkurt 2010) 

"Edhe pak ditë dhe mbarë njerëzia përkujton ditën e lindjes së njeriut që mësoi sesi ndërtohet marrëdhënia e njeriut me Zotin e tij, me veten e tjetrin! Ai që na mësoi sesi të jetojmë në harmoni me jomuslimanët e sesi të jemi mëshirues ndaj tyre! Ai që na mësoi sesi të jetojmë me krenarinë e fesë sonë, jo me frikën dhe servilizmin e realiteteve dhe dredhive të tyre!

Shfaqeni gëzimin tuaj në shtëpi, jashtë saj e kudo që të jeni! Thoni fëmijëve tuaj se pas pak ditësh përkujtojmë lindjen e dritës së gjithësisë, hazreti Muhammedit që është më i madhi i të mëdhenjve! Thoni se ai është më i madh se çdo bust e shtatore, më i madh se çdo idhull i ri a i vjetër, është njeriu që Zoti e dërgoi për lumturinë tonë! Bëjeni bajram atë ditë, atë muaj, atë stinë! Hapni dyert dhe vizitoni njëri-tjetrin me këtë rast të rëndësishëm, më të shënuarën ditë të historisë së njerëzimit!”- ka qenë kjo esenca e hytbes së mbajtur nga Imam Muhamed Sytari në xhaminë e Tophanës, ditën e xhuma, më 19 shkurt 2010. Gjatë saj ai ka vazhduar të flasë mbi mrekullitë e të dërguarit të All-llahut, si burimi i ujit nga gishtat e tij, sihariqet e ndryshme dhe dëshmia e pemës dhe e gurit për dërgesën e tij profetike.

Për kënaqësinë e të pranishmëve, ezani i dytë i xhumasë është kënduar nga një medresist në klasën e shtatë, i cili ka spikatur me zërin e ëmbël e melodioz. Në përfundim të xhumasë, besimtarë të shumtë e kanë uruar për kënaqësinë e dhuruar në këtë ditë.

V. Mehmeti