Muhamed Sytari

Dritë Arefati në xhaminë e Tophanës

(Kur'an, dhikre të shumta, përgjërime dhe salavate) 

 Pasditën e datës 26 nëntor 2009, besimtarë të shumtë janë mbledhur në xhaminë e Tophanës për të marrë pjesë në organizimin e adhurimeve me rastin e ditës së Arefatit.
Pas faljes së namazit të iqindisë nën drejtimin e thirrësit islam Imam Muhamed Sytari, të pranishmit kanë dëgjuar fjalën e rastit të mbajtur nga Imam Lavdrim Hamja, i cili ka zbardhur argumentet e madhështisë së kësaj dite, nga ajetet dhe hadithet e ndryshme profetike. Pas fjalës së tij, Imam Muhamed Sytari ka ftuar të pranishmit për t’u përgatitur shpirtërisht për fillimin e adhurimeve të kësaj dite në përngjasim me haxhilerët e Qabes së madhnueshme dhe adhurimit të tyre në Arefat.
Pas këndimit të sures Jasin, të pranishmit kanë bërë dhikre të shumta, përgjërime dhe salavate përmbi të dërguarin mëshirë për të gjitha krijesat, hazreti Muhammedin (a.s). Në fund të këtyre adhurimeve, ata kanë marrë pjesë në lutjen e gjatë në gjuhën shqipe të drejtuar nga Imam Muhamed Sytari.

Imam Ilir Dizdari
Imam i xhamisë Tophanë