Muhamed Sytari

“Unë shoh se jo shumë larg, drita e Islamit do të ndriçojë Evropën”

(Shkodër, më 08 dhjetor 2008) 

Ditën e parë të Kurban Bajramit, thirrësi islam Muhamed Sytari, nëpërmjet valëve të Tv1 Channel, ka uruar mbarë muslimanët shqiptarë me rastin e kësaj dite të bukur feste e gëzimi.

I ftuar në emisionin e gazetarit Ergys Bamçi, “Mulliri i mëngjesit”, Sytari ka shpjeguar domethënien e kësaj dite dhe simbolikën e saj, sikurse ka transmetuar disa mesazhe në lidhje me mësimet dhe dritën e fesë islame.

“Do të ishte mirë sikur edhe mediat qëndrore shqiptare të transmetonin live pelegrinazhin më të madh në botë, atë të haxhit, që sidoqoftë është më i rëndësishëm se shumë pelegrinazhe që u transmetohen muslimanëve shqiptarë nëpërmjet valëve të tyre! Megjithatë, unë shoh se jo shumë larg, drita e Islamit do të ndriçojë Evropën! Drita e Kur’anit do të përzihet me dritën e teknologjisë dhe përparimit perëndimor, për të parë një njeri më të ditur, më dashamirë, më ndërtues të jetës! Dita-ditës, rinia perëndimore po e kupton humanizmin e Islamit dhe gënjeshtrën e madhe mediatike që thuret me kohë kundra mësimeve të pastra islame”- ka thënë ndër të tjera ai.

I pyetur se përse flamuri kombëtar është vendosur në këtë ditë feste në xhaminë e Parrucës, ai duke buzëqeshur, ka thënë: “Nuk është çudi një gjë e tillë! Kurban Bajrami është festë e muslimanëve shqiptarë, festë e shqiptarëve! Nga ana tjetër, dëshmon angayhimin e muslimanit shqiptar për të qenë ndërtues i harmonisë kombëtare, harmonisë ndërfetare! Flamuri kombëtar, është flamuri ynë dhe si i tillë, na takon ta valëvisim në rast festash e ditësh gëzimi!”

I pyetur në lidhje me mesazhin e kësaj Feste, ai ka thënë: “Është ditë e bamirësisë, e sakrificës për të mirën e përkushtimin në jetë. Është ditë që na fton të mësojmë nga sakrifica e papërshkrueshme e plakut të urtë, Hz. Ibrahimit (a.s), për të sakrifikuar secili prej nesh në jetën e tij diça për hatër të Zotit Krijues!”.

Emisioni është ndjekur me shumë vëmendje nga një audiencë e konsiderueshme, jo vetëm në Shkodër, por edhe përtej saj.