Muhamed Sytari

"Darka e Resulull-llahit" në xhaminë e fshatit Bardhej

(Shkodër, e diel, më 20 prill 2008) 

 

Namazi i iqindisë së kësaj dite ka mbledhur me qindra besimtarë muslimanë të fshatit Bardhej e përreth tij, në xhaminë e re të këtij fshati, në përkujtim të lindjes së begatë të hazreti Muhammedit (a.s) dhe misionit të tij universal, si mëshirë e dhuruar.

Në këtë ceremoni festive kanë qenë të pranishëm: ish-myftiu i Shkodrës h. Faik Hoxha, thirrësit islamë Muhamed Sytari, Lavdrim Hamja, Altin Nikshiqi, imami i xhamisë së Tophanës, njëkohësisht edhe vaiz e hatib i xhamisë së Bardhejve, Ilir Dizdari.

Pas faljes së namazit të iqindisë, ceremonia ka nisur me leximin e disa ajeteve kuranore nga thirrësi islam Lavdrim Hamja.

Në fjalën e tij të rastit, h. Faik Hoxha, ka folur mbi vlerën që bart në vetëvete tubimi i muslimanëve në përkujtim të pejgamberit tonë, hz. Muhammedit (a.s). Ai ka tërhequr vëmendjen e të pranishëmve drejt shtimit të përkujtimit të Resulull-llahit (a.s) me salavate, lexime të ndryshme të jetës së tij, si dhe përvetësim të këtyre mesazheve për t’i praktikuar më pas në jetë.

Fjalimi i tij është pasuar me këndimin e disa ilahive dhe pjesëve të mevludit nga h. Faik Zaganjori, z. Sami Muçej dhe grupi i të rinjve të xhamisë Bardhej.

Në fjalën e tij, me këtë rast, thirrësi islam Muhamed Sytari, ka folur mbi dashurinë e sahabëve për pejgamberin (a.s). Duke iu referuar momenteve të fundit të jetës së Resulull-llahit (a.s) dhe disa episodeve emocionale nga marrëdhënia e sahabëve me profetin e tyre, ai ka nxitur të pranishmit drejt thellimit të ndjekjes së shembullit të hz. Muhammedit (a.s) në jetën e tij. Ai i ka bërë thirrje të pranishëmve të kujdesen për besimin e fëmijëve të tyre, për fenë e tyre, për arsimimin dhe të ardhmen e tyre, që si muslimanë, duhet të jetë sa më e ndritur e plot arritje.

Kjo ceremoni ka vijuar me këndime të tjera dhe është mbyllur me duanë e mevludit të kënduar me shumë dashuri nga h. Faik Zaganjori, që ndonëse në moshë të thyer dhe në kushte jo të mira shëndetësore ka sakrifikuar për të qenë i pranishëm në këtë tubim vlerash.

Pas faljes së namazit të akshamit, në një prej ambienteve të jashtme të xhamisë është shtruar “Darka e Resulull-llahit”- kështu e ka quajtur këtë sofër, në fjalën e tij përshëndetëse në prani të ftuarve të shumtë nga i gjithë fshati, thirrësi islam Muhamed Sytari.

“Le të jetë një traditë e mbarë dhe e mirë, kjo që po bëjmë sëbashku sonte në këtë xhami, në këtë tubim, në këtë ditë përkujtimi të pejgamberit tonë, hazreti Muhammedit (a.s). Përcjelleni edhe të tjerët gëzimin e kësaj sofre, tregojuani fëmijëve tuaj, të rinjve, përhapeni gjithandej lajmin e “Darkës së Resulull-llahit”, i cila na ka mbledhur sonte si vëllezër besimi në xhaminë tuaj”- ka thënë ai në fjalën e tij përshëndetëse.

Kjo ceremoni e veçantë u mbyll me përqafime e lutje të ngrohta.

 

Ilir Dizdari, vaiz i xhamisë Bardhej