Muhamed Sytari

Ceremoni promovuese për “MUHTESAR SAHIH EL-BUHARI”

(Tiranë, më 29 maj 2009) 

 

Ceremoni promovuese për librin

“MUHTESAR SAHIH EL-BUHARI”

 

   

Versioni i shkurtuar i librit botohet për herë të parë në gjuhën shqipe nga AIITC. Libri përmban 2230 hadithe autentike, të cilat shërbejnë si referencë për studiuesit e Islamit, studentët e fakulteteve teologjike dhe nxënësit e medreseve dhe si rregullator i jetës e i fesë së çdo besimtari musliman shqiptar.

 

AIITC promovoi ditën e premte, me 29 maj, njërin nga thesaret më të çmuara të traditës së Profetit Muhamed (a.s.), pikërisht librin “Muhtesar Sahih El-Buhari”, i cili për nga rëndësia dhe autenticiteti vjen pas Kuranit të Shenjtë.

 

Ky libër ka qenë prej kohësh në vëmendjen e Institutit Shqiptar të Mendimit dhe të Qytetërimit Islam (AIITC) për shkak të vlerës së tij teologjike dhe për gjerësinë e mesazheve hyjnore, njerëzore e shkencore që përcjell.

 

Duke qenë se vepra e plotë përmban një numër të madh hadithesh të përsëritura, AIITC vendosi që të botonte përkthimin e një versioni të shkurtuar, me titull “Muhtesar Sahih el-Buhari” (Përmbledhje e librit Sahih el-Buhari), i përpunuar nga imam Zejnudin Zubejdi dhe i përkthyer në shqip nga Telat Sula. Libri përmban 2230 hadithe autentike, të cilat krijojnë një orientim të saktë informues për të gjithë besimtarët muslimanë.

 

Për të prezantuar këtë ngjarje të madhe të spektrit botues, AIITC organizoi një ceremoni promovuese në mjediset e Muzeut Historik Kombëtar, në të cilën merrnin pjesë teologë, përfaqësues të trupit diplomatik të Egjiptit dhe të Libisë, përfaqësues të shoqatave kulturore dhe të komitetit të kulteve, përfaqësues fondacionesh e forumesh, përfaqësues të medias, intelektualë dhe besimtarë të grupmoshave të ndryshme.

 

Botuesi i veprës në gjuhën shqipe, njëkohësisht edhe drejtori i Institutit Shqiptar të Mendimit dhe të Qytetërimit Islam, Dr. Ramiz Zekaj mbajti fjalën përshëndetëse për të pranishmit dhe foli mbi vlerat që mbart botimi i publikuar së fundmi nga AIITC. Ndër të tjera, ai theksoi: “Instituti Shqiptar i Mendimit dhe i Qytetërimit Islam, e ka bërë traditë tashmë botimin e veprave të literaturës islame, për të plotësuar sadopak nevojën e lexuesit shqiptar për njohjen e botëkuptimit dhe të praktikës fetare islame. Botimet në këtë fushë kanë qenë të shumëllojshme, duke filluar me botimin e përkthimit të Kuranit në gjuhën shqipe, me broshurat e vogla njohëse mbi parimet dhe rregullat bazë të fesë, e duke vijuar me vepra voluminoze, siç është “Fikhus-Sunneh / Legjislacioni i Traditës së Profetit Muhamed a.s.”. Në kuadër të kësaj veprimtarie botuese është edhe dalja e kësaj vepre burimore të fesë islame. AIITC përveç kontributit të saj në botimin dhe publikimin e kësaj vepre, ka organizuar edhe dhurimin e saj për lexuesin shqiptar.” Në fund të fjalës së tij, Dr. Ramiz Zekaj tha se puna për publikimin e veprave të rëndësishme të besimit islam do të jetë e pandalshme nga ana e Institutit që drejtohet prej tij.

 

Më tej, fjalën e mori pedagogu i Fakultetit të Shkencave Islame në Prishtinë, Dr. Sulejman Osmani, ku sipas tij: “Imam Buhariu është njëri nga trashëgimtarët e vërtetë të gjeneratave shembullore dhe paraqet rrethin e artë në hallkën e gjatë të kolosëve që me prodhimtarinë e tyre shkencore lanë gjurmë të pashlyera në kulturën dhe civilizimin njerëzorë në përgjithësi, e të muslimanëve në veçanti. Ai paraqet kapacitetin kryesor në shkencën e hadithit, ndërsa përmbledhja që ai bëri vlerësohet si libri më i saktë menjëherë pas Kuranit. Aty përmblodhi thëniet më autentike të transmetuara nga Pejgamberi a.s. Gjithsesi është më i madhi në mesin e të mëdhenjve. Puna e tij nuk ka idil tjetër. Buhariu paraqet pikën më të lartë në majën e piramidës. Ai nuk ofroi vetëm një përmbledhje hadithesh, por solli një shembull unik në tërë punën e tij duke sistemuar njohuri nga shkencat e ndryshme islame. Ne në kohën e sotme e kemi shumë të vështirë ta kuptojmë fenomenin Buhari. Sipas vlerësimeve, ai ishte imami universal në të gjitha fushat fetare, ndërsa në hadith ka marrë epitetin “emirul muëminijne ” me çfarë nuk e shoqëron askush tjetër, qoftë në kohët e mëhershme apo të mëvonshme. Në çdo pikëpamje ishte i veçantë dhe vetëm si tillë, me një personalitet kaq madhor të plotësuar në shumë aspekte, ka merituar të marrë besën e umetit islam për amanetin e kryer në shërbim të mësimit, ruajtjes, kodifikimit dhe transmetimit të trashëgimisë së Pejgamberit a.s.

 

Buhariu ka jetuar rreth 63 vjet, por duke analizuar punën e tij dhe produktivitetin shkencor të bën të mendosh se një punë e tillë nuk mund të realizohet as për 630 vjet.” Në mbyllje ai theksoi: ”Me këtë publikim, Instituti Shqiptar i Mendimit dhe i Qytetërimit Islam po vendos edhe një gurë shumë të madh në zhvillimin e mendimit dhe qytetërimit islam. Po kryen një amanet dhe ka nisur të heqë nga qafa barrën e Sahihut të Buhariut.”

 

Në vijim, teologu Sabaudin Jashari foli mbi rolin e këtij libri për formimin e teologëve shqiptarë.  Ai tha se libri është pranuar gjerësisht nga teologët e vendeve të ndryshme të botës për dy arsye kryesore: Së pari, për vetë personalitetin e imam Buhariut, për shkak të njohurive dhe kujtesës së tij të jashtëzakonshme, gjë e cila vërtetohet edhe me faktin se ai arriti ta shkruante brenda 16 vjetësh përmbledhjen e tij të haditheve. Së dyti, libri është pranuar për shkak të metodës që ka përdorur Buhariu në formulimin e librit, duke përzgjedhur perlat profetike. Specifikë e metodës së tij është se për herë të parë në historinë botërore futi në përdorim zinxhirin e transmetimit për studimin e referencave të ndryshme historike, filozofike, sociale etj. Suksesi i metodës së tij vërtetohet edhe me faktin se arrinte në 20.000 numri i nxënësve që ndiqnin ligjëratat e tij në Bagdad.

 

Mbi jetën e veprën e Imam Buhariut dhe mbi rëndësinë e botimit të veprës së tij nga AIITC foli edhe teologu Kreshnik Osmani, i cili tha: “Përveç kontributit personal në ruajtjen e hadithit, puna e tij nxiti edhe të tjerët të hulumtojnë trashëgiminë e mbetur të Muhamedit a.s. disa i kushtëzuan vetes po ato standarde që kishte paraparë Buhariu, ndërsa të tjerët gjetën një përmbajtje shumë të gatshme dhe të përpunuar. Arritja e tij shumë e lartë i shtyu të tjerët të bëjnë sa më shumë.    

 

Të gjithë i njohin vlerat e tij dhe pranojnë se ai dinte më shumë se të tjerët, por  jo vetëm në gjeneratën e vet. Mrekullia e quajtur Buhari dhe Sahihu i tij do të vazhdojnë deri sa të ketë jetë mbi faqen e dheut.”

 

Më tej foli teologu shkodran Muhamed Sytari, i cili u përqendrua te roli dhe ndikimi që ka ky libër në jetën e përditshme të muslimanit shqiptar. Sipas Z. Sytarri, “Ky libër nxit besimin dhe respektimin e të dërguarit (a.s.), duke u bërë kështu shëmbëlltyrë kryesore për muslimanin në jetën e tij.  Gjithashtu libri nxit vlerësimin dhe ruajtjen e Sheriatit islam, si dhe ndikon në ndërtimin e individit dhe të shoqërisë islame.”

 

Pas argumenteve të detajuara mbi dobishmërinë e librit në jetën e besimtarit, ai e mbylli fjalën e tij duke përgëzuar stafin e AIITC-së për punën e ndritshme dhe kontributin e veçantë për nxjerrjen në dritë të këtyre haditheve.

 

Në fund të aktivitetit, u dhuruan kopje të librit për të pranishmit, gjithashtu u shtrua edhe një koktej, gjatë të cilit vijoi bashkëbisedimi mbi vlerat e librit dhe mbi nevojën që ka shoqëria shqiptare për të njohur mesazhet e ardhura nëpërmjet besimit islam.