Muhamed Sytari

Bidati dhe devijimet në fe

(“Kushdo që shpik diçka në çështjen tonë (në fenë islame), është e refuzuar!”) 

Tema e dersit të kësaj nate, më 21 janar 2010, në xhaminë e Tophanës ka qenë hadithi i pestë, nga dyzet hadithet e Imam Neveviut, ku Bukhariu dhe Muslimi transmetojnë nga nëna jonë Aishe (r.a) se Resulull-llahi (a.s) ka thënë: “Kushdo që shpik diçka në çështjen tonë (në fenë islame), është e refuzuar!”
“Sonte, në këtë mbrëmje të parë me këtë hadith të shkurtër, por shumë të rëndësishëm, do të mundohem të hedh dritë mbi kuptimin e përgjithshëm të tij. Duhet theksuar se prej mirësive të All-llahut ndaj kësaj feje, është se Ai e ka ruajtur atë nga devijimi e ekstremizmi nëpërmjet dy garancive të forta: fillimisht ajeti kur’anor në të cilin Ai (xh.sh) merr përsipër mbrojtjen dhe garancinë e Kur’anit, si burim kryesor i fesë islame dhe së dyti, ky hadith, nëpërmjet të cilit lajmërohet botërisht angazhimi i profetit (a.s), i trashëgimtarëve dhe pasuesve të tij deri në ditën e fundit, për ta mbrojtur Islamin nga ekstremizmi dhe çthurrja e parimeve dhe rregullave të tij!”- ka thënë në mes të tjerave vaizi i kësaj xhamie, Imam Muhamed Sytari.
Më pas ai ka shpjeguar se si devijimi dhe ekstremizmi kanë hyrë në adhurime të ndryshme, nëpërmjet injorancës së disa muslimanëve dhe keqadministrimit të dijes dhe se si këto devijime janë zbuluar dhe kritikuar nëpërmjet dijetarëve dhe mësimeve të tyre. Këtu ai ka përmendur disa sekte islame që para mexhliseve të dhikrit pijnë alkool, disa të tjerë që lënë namazin duke u mjaftuar me disa lutje, disa që neglizhojnë e mohojnë hadithin, etj.
Dersi i natës së xhuma vazhdon çdo të enjte pas namazit të jacisë, me shpjegimin e 40 haditheve të Imam Neveviut.

V. Mehmeti