Muhamed Sytari

Këngëtari Sidrit Bejleri, mik në xhaminë e Tophanës

(Shkodër, më 1 maj 2009) 

Në xhumanë të parë të muajit maj 2009, thirrësi islam Muhamed Sytari, ka vijuar me serialin e hytbeve kushtuar 300 veçorive, me të cilat Zoti Fuqiplotë e ka dalluar Hz. Muhammedin (a.s) nga të dërguarit dhe profetët e tjerë.

Në hytben e tij të radhës, ai ka hedhur dritë mbi disa prej këtyre veçorive, si: falja e hz. Muhammedit (a.s) si imam në mesin e të gjithë të dërguarve të tjerë, në Bejti Makdis, mrekullia e Israsë dhe e Miraxhit, mrekullia e ndarjes së hënës, fakti që Resulull-llahi (a.s) ka parë xhennetin dhe xhehnemin etj. “Teksa përmendim këto veçori me të cilat u dallua pejgamberi ynë mbi të gjithë të dërguarit e tjerë, duhet të kujtojmë njëkohësisht edhe mirësinë e madhe me të cilën na ka privilegjuar Zoti ynë duke na bërë pjesë e ymetit të hz. Muhammedit (a.s). E, në të njëjtën kohë, kjo na shtyn ta duam dhe ta ndjejmë për ditë e më shumë Resulull-llahin (a.s), si busullën tonë orientuese në jetë, si garancinë tonë, si më të shtrenjtin e krijesave të Zotit”- ka thënë ndër të tjera hatibi i Tophanës.

Në këtë xhuma, në xhaminë e Tophanës ka prezantuar edhe këngëtari i mirënjohur, Sidrit Bejleri. I ftuar nga hatibi i kësaj xhamie, pas namazit të xhumasë, Bejleri ka përshëndetur të pranishmit në xhaminë e Tophanës duke shprehur kënaqësinë e pjesëmarrjes së tij në faljen e kësaj xhumaje në këtë xhami.

“Në të vërtetë, kjo është xhumaja e parë që fali në qytetin tim të lindjes. U ndjeva mirë dhe kam kënaqësi që jam sot së bashku me ju në këtë vend të bukur e të ngrohtë”- ka thënë ndër të tjera ai.

Në përfundim të bisedës së tij me shumë emocion, hatibi i kësaj xhamie, i ka dhuruar këngëtarit Sidrit Bejleri, “librin e xhamisë së Tophanës”, titulluar: “Rrugëtime të një hatibi”.

“Në emrin tuaj, po i dhuroj vëllait tonë të shtrenjtë Sidrit Bejleri, librin e xhamisë tonë, në mënyrë që të jetë një kujtim domethënës i kësaj vizite dhe kësaj xhumaje të tij të parë në Shkodër dhe në këtë xhami”- është shprehur Sytari në momentin e dhuratës.

 

Ahmed Mahiri