Muhamed Sytari

Bashkëbisedim i paharruar me Hafiz Musa Hoxhën

(Shkodër, më 30 janar 2009) 

Ditën e xhuma, më 30 janar 2009, pas namazit të akshamit, në konakun e medresesë “Haxhi Sheh Shamia”, dega e vajzave, thirrësi islam Muhamed Sytari organizoi një bashkëbisedim të ngrohtë me myderrizin e moshuar Hafiz Musa Hoxha.

Në këtë tubim prezantonin thirrës islamë, teologë, drejtori i medresesë, zv/drejtorët e saj, intelektualë e të rinj, të cilët ishin ftuar për të ndarë sëbashku emocionet e rrëfimit të hafizit të fundit të një brezi hoxhallarësh që u edukuan para duarve të dijetarëve të shquar të Shkodrës dhe që morën prej tyre dijen, kulturën, përkushtimin e qytetarinë islame.

Aktiviteti u hap nga thirrësi islam Muhamed Sytari, i cili sqaroi edhe qëllimin e këtij takimi me hafizin 84- vjeçar, dëshmitar i një kohe, ku Shkodra vlonte nga dijetarët dhe myderrizët e shquar, që shpërndanin dituri e besim në çdo skaj të këtij vendi. “I fundit i atyre burrave që patën fatin të diplomoheshin e të merrnin ixhazete nga hoxhallarët e vjetër të Shkodrës, është edhe Hafiz Musa Hoxha, i cili pati mirësinë t’i përgjigjej ftesës për të qenë sëbashku me ne në këtë natë të veçantë, plot dritë hoxhallarësh e rrezatime diturie”- ka thënë ndër të tjera Sytari.

Më pas, për rreth 1 orë e gjysëm, të pranishmit kanë ndjekur me vëmendje rrëfimin e hafizit të moshuar, në të cilin ka hedhur dritë mbi fëmijërinë, rininë, kohën e kaluar para duarve të hoxhallarëve të Shkodrës, mësuesve të tij, aktivitetin e gjerë nëpër fshatrat e Shkodrës, por jo vetëm, vuajtjet e periudhës së errët të komunizmit, përjetimin e momentit të rihapjes së xhamive, aktivitetin aktual në xhaminë e fshatit Oblikë etj.

Në përfundim të bisedës së tij të ngrohtë, për të pranishmit u shpërnda edhe botimi më i ri i thirrësit islam Muhamed Sytari, mbi jetën dhe veprimtarinë e hafizit anamalas, me titull: “Hafiz Musa Hoxha- Vaizi besnik i qitabeve të vjetra”, që u prit me shumë ngrohtësi nga të ftuarit.

Ndër momentet më të paharrueshme të këtij takimi ishte momenti kur thirrësi islam Muhamed Sytari, kërkoi nga Hafiz Musa Hoxha që në këtë natë, ai t’i dorëzonte ixhazetet e tij, në mënyrë simbolike, të gjithë hoxhallarëve të pranishëm në këtë mbrëmje. “Po ta bëjmë këtë kërkesë, i dashur Hafiz, në mënyrë që besa islame e brezave shqiptarë mos të ndërpritet asnjëherë. Ju jeni i fundit i një brezi që pati mirësinë të merrte nga dora e atyre burrave të ditur, me trashëgiminë e të cilëve ne mburremi sot. Unë, me zemër, po ju kërkoj që atë shpirt bese islame me hoxhallarët e shkuar ët Shkodrës, të na e përcillni edhe ne, me lutjet dhe bekimet tuaja dhe shtrëngimin e dorës”- ishte kërkesa e Sytarit.

Me shumë emocion, Hafiz Musa Hoxha e pranoi një kërkesë të tillë dhe në praninë e të gjithëve u zhvillua një ceremoni shumë emocionuese, ku thirrësi islam Muhamed Sytari, myftiu i Malësisë së Madhe Edmir Smajlaj, imami i xhamisë Parrucë Naim Drijaj, thirrësi islam Lavdrim Hamja, imami i xhamisë Tophanë Ilir Dizdari dhe kryeimami i zonës Mes-Myselim Altin Nikshiqi, të ulur në gjunjë para Hafiz Musa Hoxhës, morën prej tij trashëgiminë e dijeve dhe besën e hoxhallarëve të shkuar të Shkodrës, shoqëruar nga lutjet dhe bekimet e tij për hoxhallarët e rinj.

Në këtë aktivitet përshëndeti edhe shkrimtari Xhahid Bushati, i cili falënderoi myderrizin e moshuar Hafiz Musa Hoxha për emocionet e shumta që dhuroi dhe njëkohësisht uroi edhe thirrësin islam Muhamed Sytari për botimin e tij të ri.

Një koktejl dhe përqafimet e përzemërta ishin mbyllja e këtij aktiviteti që u pasqyrua më pas edhe nga media vizive në Shkodër.

 

V. Mehmeti