Imam Muhamed Sytari

Namazin, amanet namazin!

(Tophanë, e xhuma, më 29 janar 2010) 

Për të tretën javë radhazi, Imam Muhamed Sytari ka vazhduar të flasë mbi vlerat dhe madhështinë e namazit në fenë islame. Nëpërmjet fjalëve dhe thënieve të ndryshme profetike dhe ato të sahabëve, ai ka tërhequr vëmendjen e të pranishëmve të shumtë në xhaminë e Tophanës drejt vlerave dhe rëndësisë së namazit, si shtylla kryesore e Islamit.
“Të gjitha obligimet fetare islame, kanë zbritur nëpërmjet shpalljes hyjnore, përveç namazit. Për të, All-llahu (xh.sh) e ka ftuar Resulull-llahin (a.s) drejt lartësive qiellore, në natën e Israsë dhe të Miraxhit, për t’ia obliguar këtë dhunti hyjnore, më të madhen prej dhuntive të Zotit ndaj këtij ymeti!”- ka thënë hatibi i Tophanës.
“Ebu Bekri (r.a) ka thënë për namazin: “Namazi është garancia e All-llahut në tokë”. Kjo do të thotë se namazi është garanci nga të këqiat, nga varfëria, nga mjerimi, nga skamja, nga degjenerimi, nga shthurrja e befasueshme me të cilën po përballet për ditë kjo shoqëri e hutuar shqiptare! Ndërkohë, Omeri (r.a) thoshte: “Nuk ka Islam, ai që nuk falë namazin!”.
Prandaj, më shumë se kurrë sot, kur poshtë e përpjetë po na flasin edhe për regjistrimin fetar të popullsisë shqiptare, duhet që secili prej nesh të drejtohet seriozosht drejt namazit, si shtylla kryesore e fesë dhe mënyra më dinjitoze e dëshmimit të qenies sonë prej muslimanëve, me krenari e dinjitet!”- ka thënë Sytari në hytben e tij.
 

Ahmed Mahiri