Muhamed Sytari

Xhenazja e Imam Vehbi Ismailit në xhaminë e Tophanës

(Shkodër, e xhuma, më 23 maj 2008) 

Sot, nëpërmjet minberit të xhumasë, thirrësi islam Muhamed Sytari, ka nisur një cikël të ri ligjëratash me temë madhështinë e besimit islam në dëshmitë e Resulull-llahit (a.s).

Në ligjëratën e tij, hatibi i xhamisë së Tophanës, i ka bërë thirrje të pranishëmve të shumtë në xhami për të bartur me sinqeritet amanetin e Resulull-llahit (a.s), përhapjen e dijes dhe bindjes në Njësinë absolute të Krijuesit të gjithësisë. “Secili prej nesh duhet të angazhohet për t’i mësuar të afërmit, mikut, fëmijës, të rinjve, dëshminë se nuk ka Zot tjetër pos All-llahut që është thelbi i fesë tonë”- ka theksuar ndër të tjera ai.

Në hytben e dytë të kësaj xhumaje, Sytari ka bërë të ditur para xhematit lajmin e ndërrimit jetë të Imam Vehbi Ismailit, në moshën 89 vjeçare, në Michigan të ShBA. Pasi ka bërë një biografi të këtij dijetari të shquar islam me origjinë shkodrane, ai ka kërkuar nga institucionet islame në vend, interesim maksimal për të mos lënë që emri i këtij dijetari dhe autori të shquar të humbasë në labirintet e pluhurosura të harresës së kombit tonë. Ai ka kërkuar vlerësimet maksimale për emrin e madh të dijetarit të shquar, themelues të Qendrës Islame Shqiptare në Michigan e përtej tij, në ShBA.

Në fund, ai ka ftuar të pranishmit që në përfundim të namazit të xhumasë të falin sëbashku namazin e xhenazes në mosprani për Imam Vehbi Ismailin, shoqëruar me një lutje për shpirtin e tij.

Namazi i xhenazes në mosprani, për shpirt të dijetarit të madh shqiptar është drejtuar nga thirrësi islam Muhamed Sytari.

Ahmed Mahiri