Muhamed Sytari

“Ruajeni tokën, pasi ajo është nëna juaj...”

(Shkodër, e xhuma, më 25 korrik 2008)  

Nëpërmjet minberit të xhumasë, hatibi i xhamisë Tophanë, thirrësi islam Muhamed Sytari, ka vazhduar me ciklin e hytbeve, nëpërmes të cilave trajtohet marrëdhënia e muslimanit me tokën, e cila do të jetë dëshmitare e tij në ditën e gjykimit.

Në ligjëratën e tij të sotme, ai ka hedhur dritë mbi hadithin e Tabaraniut, ku i dërguari i All-llahut (a.s), thotë: “Ruajeni tokën, pasi ajo është nëna juaj!”.

“Hadithi i mësipërm na edukon të ndërgjegjësohemi në veprimet e përditshme, në marrëdhënie me veten, me tjetrin e mbi të gjitha me Zotin, Krijuesin e gjithësisë”- ka cituar ndër të tjera Sytari.

Pas faljes së namazit të xhumasë, u zhvillua një tryezë intelektuale, ku referuesi kryesor, studiuesi Islam Dizdari hodhi dritë mbi sakrificat për grumbullimin e materialeve të ndryshme historike, shkencore etj. gjatë përgatitjes së veprave mbi jetën e disa hoxhallarëve të nderuar të vendit tonë. Përpara të pranishëmve të shumtë ai bëri të ditur përgatitjet që po bëhen nga shtëpia botuese “Logos-A” në Shkup, për të botuar të plotë kolanën prej 27 veprash të Imam Vehbi Ismailit.

Në fund të bisedës së tij me vlera, thirrësi islam Muhamed Sytari i dhuroi z. Dizdari, emblemën e xhamisë së Tophanës, si kujtim të këtij takimi vëllazëror.

Ahmed Mahiri